सततच्या पावसाने घराचे छत कोसळले

सततच्या पावसाने घराचे छत कोसळले
डोंबिवली पश्चिमेतील घटना
सकाळ वृत्तसेवा
डोंबिवली, ता. २ : सतत सुरू असलेल्या पावसाने डोंबिवली पश्चिमेला एका घराचे छत कोसळल्याची घटना शुक्रवारी (ता. ३१) रात्री घडली. सुदैवाने घरातील मंडळींच्या वेळीच हा धोका लक्षात आल्याने त्यांनी त्वरित घराबाहेर धाव घेतली. यामुळे यात कोणतीही जीवितहानी झालेली नाही, मात्र घराचे पूर्ण नुकसान झाले आहे.

डोंबिवली पश्चिमेत कल्याण-डोंबिवली पालिकेच्या ह प्रभाग कार्यालयासमोरील भरत भोईर नगर परिसरात ही घटना घडली. नागू बाळू म्हात्रे चाळीत रिक्षाचालक संजय तायडे हे कुटुंबासह राहतात. मे महिन्यात त्यांनी पावसाळ्याच्या आधी छताची दुरुस्ती करून घेतली होती. चाळीच्या छतावर लोखंडी अँगल आणि पत्रे आहेत. मागील काही दिवसांपासून सातत्याने पाऊस सुरू आहे. शुक्रवारी दिवसभर पावसाची रिमझिम सुरू होती. संध्याकाळी पावसाचा जोर वाढला होता.
शुक्रवारी रात्री तायडे कुटुंब जेवण आटोपून टीव्ही पाहात बसले होते. साडेदहाच्या आसपास छताच्या बाजूने काही मोडल्याचा आवाज आला. म्हणून तायडे कुटुंबीय तत्काळ घराबाहेर आले. त्यानंतर काही क्षणात छतावरील पत्रे कोसळले. पोटमाळा असल्याने पत्रे थेट घरात पडले नाहीत, अन्यथा मोठी हानी झाली असती. या वेळी मोठा आवाज झाल्याने चाळीतील इतर घरातील रहिवासीदेखील बाहेर पळाले. या घटनेची माहिती डोंबिवली पश्चिमेतील अग्निशमन दलाच्या जवानांना देण्यात आली. त्यांनी तत्काळ घटनास्थळी धाव घेत बचावकार्य केले.