रुग्णाऐवजी खाटेवर कुत्र्याचा मुक्काम

रुग्णाऐवजी खाटेवर कुत्र्याचा मुक्काम
खोडाळा आरोग्य केंद्रातील धक्कादायक प्रकार
मोखाडा, ता. २ : पालघर जिल्ह्यातील अतिदुर्गम मोखाडा तालुक्यात आरोग्य व्यवस्थेचा गलथान कारभार पुन्हा एकदा चव्हाट्यावर आला आहे. खोडाळा प्राथमिक आरोग्य केंद्रात रुग्णांसाठी असलेल्या खाटेवर चक्क एक कुत्रा आरामात झोपलेला असल्याचा व्हिडिओ सध्या समाजमाध्यमांवर मोठ्या प्रमाणावर व्हायरल झाला आहे. या धक्कादायक प्रकारामुळे आरोग्य केंद्राच्या कारभारावर संताप व्यक्त केल जात आहे.
मोखाडा तालुक्यात नुकत्याच गॅस्ट्रोच्या घटनेदरम्यान आरोग्य केंद्रातील कारभारावर रुग्णांनी व नातेवाइकांनी नाराजी व्यक्त केली होती. याच काळात खोडाळा आरोग्य केंद्रात एका खाटेवर रुग्ण दाखल असताना, त्याच्या शेजारील दुसऱ्या खाटेवर एक कुत्रा झोपलेला असल्याचा व्हिडिओ समोर आला. रुग्णांसाठी असलेल्या खाटेवर कुत्रा झोपल्याचे दिसल्याने आरोग्य केंद्राच्या ढिसाळ कारभारावर जोरदार टीका होत आहे. यामुळे खोडाळा प्राथमिक आरोग्य केंद्र टीकेचे लक्ष्य ठरले आहे.
-------------
आरोग्य केंद्रात काही रुग्ण उपचारासाठी आले होते. कदाचित तो कुत्रा त्यांच्यासोबत आला असावा, मात्र त्याकडे कर्मचाऱ्यांनी दुर्लक्ष करणे योग्य नाही. असे प्रकार पुन्हा घडू नयेत म्हणून येथील प्रशासनाला सूचना दिल्या आहेत.
- भाऊसाहेब चत्तर, तालुका वैद्यकीय अधिकारी, मोखाडा