शिक्षक, महिला मुख्याध्यापिकेची समाजमाध्यमांवर बदनामी

भिवंडी, ता. २ (वार्ताहर) : समाज माध्यमांवर अत्याधुनिक तंत्रज्ञानाचा गैरवापर करून व्यक्तींची बदनामी करण्याच्या घटना वाढत आहेत. भिवंडीतही अशीच एक धक्कादायक घटना उघडकीस आली. एका शिक्षकाचा आणि महिला मुख्याध्यापिकेचा फोटो मोर्फ करून त्याचा व्हिडिओ तयार करत इन्स्टाग्रामवर प्रसारित करण्यात आला आहे. याप्रकरणी संबंधित शिक्षकाने शांतीनगर पोलिस ठाण्यात तक्रार दाखल केली. पोलिसांनी अज्ञात व्यक्तीविरुद्ध गुन्हा नोंदवला आहे.
पोलिसांनी दिलेल्या माहितीनुसार, शांतीनगर पोलिस ठाणे हद्दीत राहणारे ५० वर्षीय शिक्षक आणि महिला मुख्याध्यापिका या दोघांचे फोटो एकत्र करून व्हिडिओ तयार करण्यात आला. हा व्हिडिओ समाजमाध्यमांवर टाकून दोघांची बदनामी करण्यात आली. तक्रारीच्या आधारे शांतीनगर पोलिस ठाण्यात शुक्रवारी (ता. ३०) अज्ञात व्यक्तीविरुद्ध गुन्हा नोंदवण्यात आला आहे. या प्रकरणाचा पुढील तपास पोलिसांकडून सुरू आहे.