कथकाच्या नयनरम्य रंगांनी ठाणे नगरी दुमदुमूली..

कथकच्या नयनरम्य रंगांनी ठाणे नगरी दुमदुमली
वैजयंती नृत्य अकॅडमीचा नृत्य महोत्सव उत्साहात
ठाणे, ता. १२ (बातमीदार) : रसिका रंजन सभा आयोजित नृत्य प्रतिभा महोत्सवात वैजयंती नृत्य अकॅडमीने ‘कथक रंग-शेड्स ऑफ कथक’ हा नृत्य सोहळा सादर केला. गुरू स्नेहल जांभेकर यांच्या संकल्पनेतून साकारलेल्या कार्यक्रमात गुरू आणि शिष्यांनी कथक नृत्याच्या विविध अंगांची सुरेख गुंफण सादर केली.
या कार्यक्रमाची सुरुवात गणेश व सरस्वती वंदनेने झाली, तसेच वरिष्ठ शिष्यांच्या सादरीकरणाने शिस्त आणि सौंदर्याचा संगम निर्माण केला. गुरू स्नेहल जांभेकर यांनी तीन तालांवर आमद, तोडा, परन, तत्कार आणि कवित्त या नृत्यदृश्यांनी प्रेक्षकांचे मन जिंकले. लहान शिष्यांनी हस्तमुद्रांचे अर्थ सांगणारे मोहक सादरीकरण केले. याशिवाय ठुमरीतून राधा-कृष्णांच्या दैवी प्रेमाची भावपूर्ण अभिव्यक्ती प्रेक्षकांना भावली.
उत्कर्षबिंदू म्हणजे पं. मुकुंदराज देव यांच्या संगीतावर आधारित दशावतार नृत्यनाट्य हे गुरू व शिष्यांनी मिळून सादर केले. याप्रसंगी स्नेहल जांभेकर यांना नाट्यरत्न आणि त्यांच्या शिष्यांना युवा रसिका सितारा हा मानद पुरस्कार प्रदान केला. सादरकर्त्यांमध्ये स्मिता अय्यर, वर्षा नायक, शालिनी राय, विद्या शेटकर, प्राची दांडेकर, अवनी अय्यर, अनिका माथुर, अनन्या आव्हाड, स्वरा नाबर आणि प्रचिती देशपांडे यांचा समावेश होता.