लाखोंचा विहीरदुरुस्ती खर्च पाण्यात!

जव्हार, ता. १२ (बातमीदार) : देशाच्या स्वातंत्र्याला ७८ वर्षे उलटली. देशाने डिजिटल क्रांतीही स्वीकारली, मात्र जव्हार तालुक्यातील भागडा ग्रामपंचायतीतील ग्रामस्थांना पाण्यासाठी अजूनही वणवण करावी लागते. विशेष म्हणजे, गावातील प्रमुख विहीर तीनवेळा दुरुस्त करण्यात आली, तरीही पाण्याचा प्रश्न सुटला नाही. तीनदा खर्च करूनही ‘एक थेंब पाणी नाही’, अशा शब्दांत ग्रामस्थांनी संताप व्यक्त करत आक्रमकता दाखवली.

विहिरीच्या दुरुस्तीच्या नावाखाली लाखोंचा खर्च करण्यात आला, पण कामाचा दर्जा आणि निकाल शून्य. दरवेळी नुसते फोटोसेशन, काम मात्र ढिसाळ अशा आरोपांनी ग्रामपंचायतीवर ग्रामस्थांनी थेट बोट ठेवले आहे. माहितीचा अधिकार कायद्यांतर्गत मागवलेली माहिती दीड महिना उलटूनही ग्रामपंचायतीने अद्याप दिलेली नाही. ‘माहिती देऊ, देऊ’, अशी टाळाटाळ सुरू आहे. यामुळे गावात प्रशासनाविरोधात रोष निर्माण झाला आहे.

तीनवेळा विहीर दुरुस्ती झाली, पण एकदाही पाणी आले नाही. निधी कुठे गेला? काम कोणाच्या देखरेखीखाली झाले? आणि त्याची जबाबदारी कोणाची? असा थेट सवाल ग्रामस्थांनी उपस्थित केला आहे. विहिरीत पाणी नाही, पण भ्रष्टाचार मात्र ओसंडून वाहतोय, अशी संतप्त प्रतिक्रिया ग्रामस्थांकडून व्यक्त होत आहे.

ठिय्या आंदोलनाचा इशारा
विहीर दुरुस्त झाली की पैसा वाहतो, पण पाणी मात्र नाही, अशा शब्दांत संताप व्यक्त करण्यात येतो. अधिकाऱ्यांच्या निष्क्रियतेमुळे भागडा गावातील पाण्याचा प्रश्न दिवसेंदिवस गंभीर होत चालला आहे. आता ग्रामस्थांचा संयम सुटू लागला आहे. दरम्यान, पाणीटंचाईने हैराण झालेल्या ग्रामस्थांनी येत्या काही दिवसांत ग्रामपंचायत कार्यालयासमोर ठिय्या आंदोलन करण्याचा इशारा दिला आहे.

पाणीटंचाईने हैराण आम्ही झालो आहोत. येत्या काही दिवसांत ग्रामपंचायत कार्यालयासमोर ठिय्या आंदोलन करण्याचा इशारा ग्रामस्थांकडून देत आहोत.
- सागर भोये, रहिवासी

गावामध्ये नवीन विहिरीसाठी सुमारे १० ते १५ लाखांचा निधी आला होता, मात्र राजकीय कार्यकर्त्यांनी आपल्या शेतावरती विहीर बांधून तिचा उपयोग शेतीसाठी करीत आहेत. ती विहीर गावासाठी बांधली गेली असती, तर गावाचा पाण्याचा प्रश्न सुटला असता. या विहिरीची तत्काळ चौकशी करून दोषींवर कारवाई करून हा प्रश्न निकाली लावून भागडा गावातील लोकांच्या पिण्याच्या पाण्याचा प्रश्न सोडवण्यात यावा.
- गोपाळ धूम, सामाजिक कार्यकर्ता

भागडा ग्रामपंचायतीमधील विहिरीबाबत तक्रार समजली आहे. सध्या वैद्यकीय रजेवर आहे. मागील दिवसांत त्यासंदर्भात संबंधित विभागाला सूचित केले आहे.
- डी. एस. चित्ते, गटविकास अधिकारी