वसईतील नवीन पुलावरील रस्ता गायब

विरार, ता. १२ (बातमीदार) : वसई पूर्व आणि पश्चिमेला जोडणारा जुना पूल आता तोडण्यात आला आहे. पूर्वेकडील बाजूस पेट्रोलपंप जवळून उतरण रस्ता होता, परंतु आता नव्या पुलाला हा उतरण रस्ता देण्यात आला नसल्याने पूर्वेला औद्योगिक वसाहतीत राहणाऱ्या नागरिकांसह औद्योगिक वसाहतीतील कारखानदारांना त्याचा त्रास होणार आहे.

पूर्वी हा पूल महापालिका बांधणार होती, परंतु आता हा पूल रेल्वे महामंडळ बांधणार आहे. वसई पूर्व-पश्चिमेला जोडणारा महापालिका हद्दीतील जुना खाडीवरील पुलाचे काम हाती घेतले आहे. या पुलाला पूर्वी इंडियन ऑइलजवळून पूर्वेला येण्यासाठी रस्ता ठेवला होता. त्याचा फायदा पूर्वेकडील औद्योगिक वसाहत रहिवासी क्षेत्र व पेट्रोलपंप, नवघर पूर्व स्मशानभूमीमध्ये येण्यासाठी होत होता, परंतु आता पूर्वेकडे जाण्यासाठी मार्ग ठेवलेला नाही. भविष्यातील वाढणारी लोकसंख्या लक्षात घेऊन पुढील ५० वर्षांचे नियोजन पाहता व वाहतूक समस्या लक्षात घेता हा रस्ता इंडियन ऑइल पंपाकडून ठेवण्यात यावा, जेणेकरून कोंडी होणार नाही, अशी विनंती शिवसेनेच्या राजाराम बाबर यांनी रेल्वे महामंडळाचे अध्यक्ष विलास सोपान वाडेकर यांच्याकडे पत्राद्वारे केली आहे.

नागरिकांना त्रास
जुना पूल सात मीटर रुंद होता, तर आता तो ११ मीटर करण्यात आल्याने नरवीर चिमाजी आप्पांच्या स्मारकाच्या कामालाही बाधा येणार आहे. पूर्वेला पेट्रोलपंपाजवळच चार्जिंग स्टेशनही उभारण्यात येणार असल्याने त्या ठिकाणी येणाऱ्या नागरिकांनाही द्रविडी प्राणायाम करावा लागणार आहे.

पूर्वेकडील औद्योगिक वसाहतीमध्ये जवळपास ७० ते ७५ हजार कामगार काम करतात. त्यातील बरेच कामगार हे उत्तर वसईतील असून, ते वाहनांनी येतात. त्यांना आता वळसा घालून पूर्वेला यावे लागेल. त्याचप्रमाणे रहिवासी वसाहतीतील नागरिकांना पश्चिमेला जातानाही वळसा घालून जावे लागणार आहे. रेल्वेने रस्ता कायम ठेवावा अन्यथा आंदोलन करावे लागेल.
- फ्रान्सिस फर्नांडिस, उपाध्यक्ष, वसई इंडस्ट्रियल असोसिएशन