डोंबिवलीतील तरुणाच्या हत्येप्रकरणी ६ जणांना अटक

डोंबिवलीतील तरुणाच्या हत्येप्रकरणी सहा जणांना अटक
सकाळ वृत्तसेवा
डोंबिवली, ता. १२ : शहरात शनिवारी (ता. ८) मध्यरात्रीनंतर आकाश सिंग या तरुणाची किरकोळ वादातून हत्या झाल्याची घटना घडली होती. मारेकऱ्यांचा शोध घेण्यासाठी मानपाडा पोलिसांनी विशेष पथके तयार केली होती. याप्रकरणी सहा जणांना पोलिसांनी अटक केली आहे. अमर महाजन, अक्षय वागळे, अतुल कांबळे, नीलेश ठोसर, प्रतीक सिंग, लोकेश चौधरी अशी अटक आरोपींची नावे आहेत. डोंबिवलीमधील मालवण किनारा हॉटेलच्या बाहेर शनिवारी रात्री एकच्या सुमारास ही हत्येची घटना घडली होती. आकाश हा डोंबिवलीत आला होता. हॉटेलमधून बाहेर पडत असताना त्याचा हॉटेलबाहेर उभ्या असलेल्या एका अनोळखी तरुणाला धक्का लागला. या किरकोळ कारणावरून त्यांच्यात वाद झाला. हा वाद एवढा वाढला की त्या तरुणाने दुसऱ्या तरुणांना घटनास्थळी बोलावून घेतले. या तरुणांनी आकाशवर धारदार शस्त्राने वार केले. यात गंभीर जखमी झालेल्या आकाशचा मृत्यू झाला होता. याप्रकरणी मानपाडा पोलिसांनी गुन्हा दाखल करून आरोपींना अटक केली आहे.