मुलुंडमध्ये महिलांच्या आरोग्यासाठी अभिनव उपक्रम

मुलुंडमध्ये महिलांच्या आरोग्यासाठी अभिनव उपक्रम
मुलुंड, ता. १२ (बातमीदार) : येथील फोर्टिस रुग्णालयातर्फे बुधवारी ‘ओजस्य’ या सर्वसमावेशक आरोग्य उपक्रमाचा शुभारंभ झाला. “आनंदी आयुष्यासाठी निरोगी महिला” या संकल्पनेवर आधारित या उपक्रमाचा उद्देश महिलांच्या प्रतिबंधात्मक आरोग्याविषयी जागरूकता वाढवणे, कर्करोगाचे लवकर निदान, मानसिक आरोग्याचे संवर्धन आणि जीवनशैलीजन्य आजारांवरील नियंत्रण या विषयांवर लक्ष केंद्रित करणे हा आहे. या वेळी अभिनेत्री तेजश्री प्रधान विशेष अतिथी म्हणून उपस्थित होत्या. या कार्यक्रमात डॉक्टर, समाजसेवक, महिला रुग्ण आणि आरोग्य क्षेत्रातील तज्ज्ञ सहभागी झाले होते. सर्वांनी एकत्र येऊन महिलांच्या आरोग्याविषयी विविध पैलूंवर विचारमंथन केले. या उपक्रमांतर्गत दर तीन महिन्यांनी विशेष सत्रांचे आयोजन करण्यात येणार असून, त्यात प्रतिबंधात्मक ऑन्कोलॉजी, हार्मोनल आरोग्य, ताण नियंत्रण, पोषण आणि सर्वायव्हरशिप यांसारखे विषय हाताळले जातील.