‘एटीएस’ने ताब्यात घेतलेल्या अबिदी याची पत्नी मागणार न्यायालयात दाद

‘एटीएस’ने ताब्यात घेतलेल्या अबिदी याची पत्नी मागणार न्यायालयात दाद

सकाळ वृत्तसेवा
ठाणे, ता. १२ : मुंब्रा येथून दहशतवाद विरोधी पथकाने (एटीएस) ताब्यात घेतलेले इब्राहिम अबिदी हे भायखळा येथील महाविद्यालयात ३५ वर्षे शिक्षक होते. ते सध्या दुसरी पत्नी आणि तीन मुलांसह मुंब्रा येथे राहत आहेत. तसेच इब्राहिम यांना ताब्यात घेतल्यानंतर रात्री उशिरापर्यंत त्याच्याबाबत कुठलीही माहिती न मिळाल्यामुळे वकिलांनी दिलेल्या सल्ल्यानुसार संबंधित चार विभागांकडे याबाबतची तक्रार दाखल करण्यात आली आहे. याशिवाय आणखी १० पोलिस ठाण्यांमध्ये तक्रार दाखल करणार असून, सर्वोच्च न्यायालयात दाद मागणार आहे, अशी माहिती इब्राहिम यांच्या पत्नी मेहजबिन यांनी दिली.

दहशतवाद विरोधी पथकाच्या पुणे विभागाने मंगळवारी (ता. ११) मुंब्र्यातील कौसा भागातील किफायत इमारतीच्या दुसऱ्या माळ्यावरील रूम नंबर २०२मध्ये दुसऱ्या पत्नीसह रहात असलेल्या इब्राहिम अबिदी याला ताब्यात घेऊन पुढील चौकशीसाठी त्याच्या कुर्ला येथील पहिल्या घरी नेले. त्यानंतर प्रसारमाध्यमांनी मुंब्र्यातील घराकडे धाव घेतली. अबिदी यांचे मुंब्र्यातील कुटुंब मानसिक तणावाखाली आहे. याचदरम्यान इब्राहिम याची दुसरी पत्नी मेहजबिन यांनी दहशतवाद विरोधी पथकाने त्यांच्या घरातील संगणकातील हार्ड डिस्क तसेच कुटुंबातील इतर सदस्यांचे मोबाईल नेल्याचे सांगितले.
इब्राहिम यांचा संबंध नुकताच दिल्ली येथे झालेल्या बॉम्बस्फोटाशी जोडला गेल्याने त्यांनी तीव्र शब्दांत नाराजी व्यक्त केली. मागील पाच वर्षांपासून ज्या इमारतीमध्ये ते कुटुंबासह राहत आहेत. तेथील काही रहिवाशांनी अबिदी कुटुंबाबाबत कुठलीही तक्रार नसल्याचे सांगितले.