केडीएमसी अधिकाऱ्यांचे श्राद्ध घालून एल्गार

रस्ता दुरुस्तीसाठी महिलांचा एल्गार
केडीएमसी अधिकाऱ्यांचे श्राद्ध घालून निषेध

सकाळ वृत्तसेवा

डोंबिवली, ता. १४ ः कल्याण-डोंबिवली महापालिकेच्या खराब रस्त्यांविरोधात शुक्रवारी ‘श्राद्ध’ विधीने नागरिकांनी रोष व्यक्त केला. आडिवली परिसरातील रस्त्यांची दयनीय अवस्था आणि पालिकेच्या सततच्या दुर्लक्षामुळे आई एकविरा महिला मंडळाने केडीएमसी मुख्यालयासमोर महापालिका अधिकाऱ्यांचे प्रतीकात्मक श्राद्ध घातले. महिलांच्या घोषणांनी मुख्यालय परिसर दणाणून गेला. “टॅक्स भरतो, मग रस्ता कुठे", "काव काव रस्ता खाव खाव" अशा घोषणांनी आंदोलन अधिक तीव्र झाले.
आडिवलीतील रस्ते गेल्या दहा वर्षांपासून अत्यंत खराब स्थितीत आहेत. खड्डे, चिखल आणि धुळीमुळे दररोज हजारो नागरिक त्रस्त आहेत. वारंवार तक्रारी, अर्ज, मागण्या करूनही महापालिकेने दखल घेतली नाही. आई एकविरा महिला मंडळाने गेल्या अडीच वर्षांत सतत पत्रव्यवहार करत पालिकेला रस्ता करण्याची मागणी केली. त्यानंतर पालिकेने पाच महिन्यांत रस्ता तयार होईल, असे आश्वासन दिले. मात्र महिन्यांवर महिने गेले आणि रस्ता आजतागायत सुरूही झाला नाही.
खराब रस्त्यांमुळे शाळकरी मुले, महिलां, वयोवृद्ध आणि रुग्णांची सततची गैरसोय, वारंवार होणारे अपघात, या सर्व मुद्द्यांचा महिलांनी उल्लेख केला. प्रशासनाकडून केवळ ‘लवकरच काम सुरू होईल’ अशा उत्तरांनी नागरिकांचा संताप वाढला. त्यामुळेच महिलांनी महापालिकेच्या निष्क्रिय कारभाराचे ‘श्राद्ध’ घालण्याचा निर्णय घेत आंदोलन केले. यापुढे कामात विलंब झाला, तर आम्ही थेट रास्ता रोको करू असा इशारा महिला मंडळाने प्रशासनाला दिला आहे.