नस्ती गहाळप्रकरणी चौघांविरोधात गुन्हा

ठाण्यात नस्ती गहाळप्रकरणी चौघांविरोधात गुन्हा
सकाळ वृतसेवा
ठाणे, ता. ६ ः ठाणे महापालिकेच्या शहर विकास विभागातील एक महत्त्वाची विकास प्रस्ताव नस्ती गहाळ झाल्याचा गंभीर प्रकार समोर आला आहे. याप्रकरणी चार कर्मचाऱ्यांविरोधात नौपाडा पोलिस ठाण्यात गुन्हा दाखल करण्यात आला आहे. यामध्ये एका मृत कर्मचाऱ्याचा समावेश आहे.
ही नस्ती गहाळ झाल्याचे प्रकरण माहिती अधिकार कायद्यांतर्गत मागविलेल्या कागदपत्रांमुळे उघड झाले. सुमारे दीड वर्षांपूर्वी एका नागरिकाने विकास प्रस्तावातील साक्षांकीत प्रत मिळविण्यासाठी अर्ज केला होता. त्यांना शुल्क भरण्याचा संदेश देण्यात आला; परंतु शुल्क भरल्यानंतरही अपेक्षित कागदपत्रे देण्यात आली नाहीत. वारंवार पाठपुरावा करूनही माहिती न मिळाल्याने अर्जदाराने प्रथम अपील, त्यानंतर राज्य कोकण खंडपीठात तक्रार दाखल केली. सुनावणीदरम्यान संबंधित उपअभियंत्यांनी नस्ती कार्यालयात उपलब्ध नसल्याचे सांगितल्यानंतर आयोगाने महापालिकेला नस्ती नसल्याचे शपथपत्र देण्याचे निर्देश दिले. महापालिकेने २९ ऑक्टोबरला राज्य माहिती आयोगाकडे शपथपत्र सादर करून नस्ती कनिष्ठ अधिकाऱ्यांकडून गहाळ झाल्याचा उल्लेख केला. नस्ती गायब होणे ही गंभीर बाब मानून राज्य माहिती आयोगाने संबंधितांवर फौजदारी कारवाई करण्याचे आदेश दिले. या आदेशानुसार महापालिकेतील आजी-माजी लिपिक, शिपाई अशा चार कर्मचाऱ्यांविरोधात गुरुवारी (ता. ४) नौपाडा पोलिस ठाण्यात गुन्हा नोंदविण्यात आला आहे. याप्रकरणी वरिष्ठ पोलिस निरीक्षक अभय महाजन यांच्या मार्गदर्शनाखाली तपास सुरू आहे.