अजय मदनेची सुवर्ण धाव

अजय मदनेची सुवर्ण धाव
मुंबई विद्यापीठस्तरीय आंतरमहाविद्यालयीन स्पर्धा

घाटकोपर, ता. ७ (बातमीदार) : मुंबई विद्यापीठाच्या क्रीडा व शारीरिक शिक्षण विभागाच्या वतीने नुकतेच चिपळूण, रत्नागिरी येथे मुंबई विद्यापीठस्तरीय आंतरमहाविद्यालयीन मैदानी स्पर्धेचे आयोजन केले होते. या स्पर्धेत ज्ञान प्रसारक शिक्षण संस्थेच्या पार्कसाईट, विक्रोळी (पश्चिम) येथील इंदिरा गांधी महाविद्यालयाचा विद्यार्थी अजय मदने याने ५ किलोमीटर धावणे शर्यतीत सुवर्ण पदक व १० किलोमीटर धावणे शर्यतीत रौप्यपदक पटकावले. या यशामुळे त्याची नांदेड येथील स्वामी रामानंद तीर्थ मराठवाडा विद्यापीठ येथे होणाऱ्या २७ व्या महाराष्ट्र राज्य आंतरविद्यापीठ क्रीडा स्पर्धा ‘क्रीडा महोत्सव २०२५’साठी निवड झाली आहे.
त्याचप्रमाणे महाविद्यालयाचा विद्यार्थी शंकर उत्तम साळुंखे याचीदेखील राज्यस्तरीय क्रीडा महोत्सवांतर्गत कबड्डी स्पर्धेसाठी मुंबई विद्यापीठाच्या कबड्डी संघात, तर संस्थेच्या टागोर नगर, विक्रोळी (पूर्व) येथील संदेश महाविद्यालयातील विद्यार्थीनी निधी राजोले हिची कबड्डी संघात निवड झाली.