महिला सशक्तीकरणाचा निर्धार

महिला सशक्तीकरणाचा निर्धार
पनवेल पालिकेचे दोनदिवसीय जागृती प्रशिक्षण
पनवेल, ता. ९ (बातमीदार)ः महापालिका क्षेत्रातील महिलांना स्वावलंबी व सशक्त बनवण्यासाठी, व्यावसायिक, सामाजिक कौशल्य वाढवण्यासाठी पनवेल महापालिका विविध लघुउद्योग, कौशल्यविकास प्रशिक्षण मोफत देणार आहे. चारही प्रभागांतील २० हजार महिलांना फायदा होणार आहे.
महिलांना स्वावलंबी, सबळ बनविणे तसेच त्यांचा व्यावसायिक आणि सामाजिक सक्षमीकरणासाठी पनवेल महापालिका महिला व बालकल्याण विभागाच्या वतीने दोनदिवसीय प्रशिक्षण दिले जाणार आहे. या कार्यक्रमाचा उद्देश महिलांना आरोग्य, रोजगार, व्यवसाय, कायदे, तंत्रज्ञान आणि सामाजिक हक्कांविषयी माहिती देऊन त्यांना आत्मनिर्भर बनवणे आहे. महिलांच्या सुदृढ आरोग्यासाठी मासिक पाळी स्वच्छता, मानसिक आरोग्य, कॅन्सरविषयक जनजागृती तसेच आधुनिक आरोग्य साधनांचा वापर याविषयी मार्गदर्शन केले जाणार आहे. योगाचा शारीरिक आणि मानसिक आरोग्यावर होणारा सकारात्मक परिणाम, ध्यानाचे फायदे तसेच प्राणायामाचे व्यावहारिक प्रात्यक्षिक महिलांना दिले जाणार आहे.
-----------------------------
रोजगार संधी
- नवी मुंबई विमानतळ, एमआयडीसी, जेएनपीटी, पर्यटन, हॉस्पिटॅलिटी क्षेत्रातील रोजगार संधी, ऑनलाइन व्यवसाय, डिजिटल बँकिंग, गुंतवणूक पर्याय तसेच घरातून सुरू करता येणारे व्यवसाय, या विषयांवर प्रशिक्षणाबाबत मार्गदर्शन केले जाणार आहे.
- महिलांसाठीचे कायदे, हुंडाबंदी, स्त्री-भ्रूणहत्या प्रतिबंध, ‘पनवेल कनेक्ट ॲप’चा वापर, शासकीय योजना, वेबसाईटवरून अर्ज प्रक्रिया अशा विषयांबाबत माहिती दिली जाणार आहे.