माथेरानमध्‍ये पर्यटकांची गैरसोय

मुंबई : माथेरानमध्‍ये प्रेक्षणीय स्थळांच्या ठिकाणी असणाऱ्या शौचालयांची दुरवस्था झाली आहे. त्‍यामुळे पर्यटकांसह नागरिकांची गैरसोय होत आहे. पर्यटनाचा दर्जा टिकविण्यासाठी येथील दुरवस्था झालेली शौचालये सुस्थितीत करावीत; तसेच रस्त्यावरील दिवाबत्ती आणि रस्त्यांची सुधारणा करावी, अशी मागणी पर्यटकांकडून जोर धरत आहे. 

माथेरानमध्ये 38 प्रेक्षणीय स्थळे आहेत. सर्व प्रेक्षणीय स्थळे वन खात्याच्या अखत्यारित येत असल्याने, येथे वनसंरक्षक समितीअंतर्गत पर्यटन व नागरिकांना सुविधा पुरविण्याचे; तसेच विकासकामे करण्याचे सर्वस्वी अधिकार आहेत. येथील एको पॉईंटवरील शौचालयांची दुरवस्था झाली आहे. वन विभागाने 30 लाख रुपये खर्चून 16 शौचालये बांधली आहेत. एको पॉईंट येथे 4 शौचालये असून ती दुरवस्थेत आहेत.

आम्ही एको पॉईंटला आलो असता आम्हाला शौचालयाला जायचे होते; मात्र येथील शौचालये अतिशय वाईट अवस्थेत होती. आमच्याकडून कर घेतला जातो; मग आम्हाला सोई-सुविधा का मिळत नाहीत? येथील प्रशासन कररूपात मिळणारा पैसा काय करते? असा प्रश्‍न पर्यटक ऍड. गीता पाटील यांनी उपस्‍थित केला आहे. 

माथेरानमधील एको पॉईंट येथे वन-व्यवस्थापनाची 4 शौचालये असून ती सध्या खराब अवस्थेत आहेत. त्या शौचालयांची तातडीने सुधारणा करून आम्ही चालविण्यास देणार आहोत. आमच्याकडून पर्यटकांना चांगल्या सुविधा देण्याचा आमचा प्रयत्न राहील. 
- योगेश जाधव, अध्यक्ष वन-व्यवस्थापन समिती