मुंबई महानगरातील सर्वाधिक लांबीचा बोगदा पनवेल-कर्जतदरम्यान

मुंबई - मुंबई महानगरातील सर्वाधिक लांबीचा बोगदा (Long Tunnel) पनवेल-कर्जतदरम्यान (Panvel-Karjat) उभारण्यात येणार आहे. पनवेल-कर्जत दुहेरी रेल्वेमार्गाच्या कामानिमित्त तीन बोगदे तयार केले जाणार आहेत. यापैकी वावर्ले येथील बोगदा २.६ किमी लांबीचा तयार करण्यात येणार आहे.

मुंबई रेल्वे विकास महामंडळाने (एमआरव्हीसी) मुंबई नागरी परिवहन प्रकल्प ३ (एमयूटीपी ३) अंतर्गत पनवेल ते कर्जत दुहेरी रेल्वे मार्ग हाती घेतला आहे. हा मार्ग तयार झाल्यास सीएसएमटी-कर्जत मार्गे पनवेल हा रेल्वेचा नवा पर्याय उपलब्ध होईल.

सध्याच्या ठाणे-दिवा दरम्यानच्या १.६ किमीच्या पारसिक बोगद्यानंतर पनवेल-कर्जतदरम्यानच्या वावर्ले येथील २.६ किमी लांबीचा बोगदा मुंबई महानगरातील सर्वाधिक लांबीचा बोगदा असेल, असे एमआरव्हीसीच्या अधिकाऱ्यांनी सांगितले.

पनवेल-कर्जत या नव्या २९.६ किमीच्या दुहेरी रेल्वे मार्गासाठी ७५ टक्के भूसंपादन झाले, तर उर्वरित भूसंपादनाची प्रक्रिया सुरू आहे. या मार्गासाठी दोन हजार ७८३ कोटी रुपयांचा अंदाजित खर्च येणार असून मार्च २०२५ पर्यंत प्रकल्प पूर्ण होण्याची अपेक्षा आहे.

पारसिक बोगदा १.३ किमी

मुंबई ते कल्याण रेल्वेमार्गाच्या दोन मुख्य मार्गिका पारसिक बोगद्यातून जातात. हा बोगदा १.३ किमी लांबीचा असून त्या वेळी भारतीय रेल्वेवरील एक किमीपेक्षा जास्त लांबीचा हा पहिला बोगदा होता. तेव्हा तो आशियातील तिसऱ्या क्रमांकाचा सर्वाधिक लांबीचा बोगदा होता. या बोगद्यामुळे मुंबई ते कल्याणमधील अंतर ९.६ किमीने कमी झाले आहे. आता या बोगद्यातून जलद लोकल ट्रेन जाणे बंद झाले आहे. बोगद्यातून मालगाड्या, एक्स्प्रेस, पार्सल गाड्या जातात.

नवा मार्ग असा

पनवेल-कर्जत दरम्यान पनवेल, चौक, मोहापे, चिखले, कर्जत अशी पाच स्थानके असतील. याशिवाय फलाट, पादचारी पूल, भुयारी मार्ग इत्यादी कामे होणार आहेत. ३.१२ किमीचे तीन रेल्वे बोगदे असणार आहेत. तसेच या रेल्वेमार्गावर दोन रेल्वे उड्डाणपूल, आठ मोठे पूल आणि ३६ लहान पूल असणार आहे.