|
मुंबई - विवाहितेला अश्लील संदेश पाठवणाऱ्या युवकाला वडाळा पोलिस ठाण्यातील महिला पोलिस अधिकाऱ्याने नुकतीच जम्मू-काश्मीरमधील भारत-पाकिस्तान सीमेनजीक अटक केली. मेहफूज मोहम्मद राशिद खान (30) असे या युवकाचे नाव आहे.
वडाळा येथे राहणाऱ्या या विवाहितेस काही महिन्यांपूर्वी अनोळखी क्रमांकावरून व्हॉट्सऍपवर एकामागोमाग एक अश्लील व्हिडिओ येऊ लागले. तिने याबाबत पतीला सांगितल्यानंतर त्याने त्या क्रमांकावर दूरध्वनी करीत जाब विचारला. त्या वेळी मेहफूजने त्याला शिवीगाळ केली. "आपको किसके पास जाना है जाओ, कोई मेरा कुछ नई बिघाड सकता,' असेही त्याने या दाम्पत्याला सांगितले.
विवाहितेच्या पतीने पाच जानेवारीला याप्रकरणी वडाळा पोलिस ठाण्यात तक्रार नोंदवली. तपासादरम्यान मेहफूजचा क्रमांक जम्मू-काश्मीरमधील राजौरी गावातील असल्याचे आढळले. वडाळा पोलिस ठाण्याच्या गुन्हे अन्वेषण कक्षातील महिला अधिकाऱ्याने दोन शिपायांसह जाण्याची तेथे इच्छा दर्शवली. ते तिघेही 18 एप्रिलला जम्मू-काश्मीरसाठी रवाना झाले. अनोळखी भागांत मेहफूजला शोधण्यात अनेक अडचणी येत होत्या.
मात्र, स्थानिक पोलिसांच्या मदतीने शिताफीने मेहफूजला ताब्यात घेत या तिघांनी त्याला सोमवारी मुंबईत आणले. वडाळा पोलिसांनी त्याच्याविरोधात भा. दं. संहितेचे कलम 354(अ)(1), (3), माहिती तंत्रज्ञान कायदा 67(अ) अन्वये गुन्हा नोंदवून अटक केली.
|
