नांदेड जिल्ह्यात पावसाने ओलांडली सरासरी, १०१.८२ टक्के नोंद

अभय कुळकजाईकर
Saturday, 26 September 2020

नांदेड जिल्ह्यात शुक्रवारी (ता. २५) जोरदार पाऊस झाला. जिल्ह्यातील एका तालुक्यासह सहा मंडळात अतिवृष्टी झाली. त्यामुळे पिकांचे नुकसान वाढण्याची शक्यता आहे. त्याचबरोबर यंदाच्या वर्षी पावसाने सरासरी ओलांडली सरासरी आहे. जिल्ह्यात ८०३.६० मिलीमीटरनुसार १०१.८२ टक्के पावसाची नोंद झाली आहे.
 

नांदेड - दोन दिवस मंदावलेल्या पावसाने शुक्रवारी (ता. २५) पुन्हा नांदेड जिल्ह्याला झोडपून काढले. हा पाऊस मुखेड, कंधार, हदगाव, देगलूर, नायगाव तालुक्यात जोरदार झाला. यामुळे नायगाव तालुक्यासह सहा महसूल मंडळात अतिवृष्टीची नोंद झाली. शनिवारी (ता. २६) सकाळी आठपर्यंत जिल्ह्यात सरासरी १५.१० मिलीमीटर पाऊस झाला. दरम्यान शनिवारी जिल्ह्यात पावसाने चार महिन्याची सरासरी ओलांढत जिल्ह्यात ८०३.६० मिलीमीटरनुसार १०१.८२ टक्के पावसाची नोंद झाली आहे.

नांदेडमध्ये मागील पंधरा दिवसापासून पावसाने मुक्काम केला आहे. या काळात अनेक मंडळात अतिवृष्टी झाल्यामुळे पुरस्थिती निर्माण झाली होती. तसेच जिल्ह्यातील गोदावरी, आसणा, लेंडी, कयाधू, पैनगंगा नदीला पूर आल्यामुळे नदीकाढच्या हजारो हेक्टरवरील खरिप पिकांचा घास घेतला आहे. यासोबतच अतिवृष्टी झालेल्या भागात शेतात पाणी साचून ८२ हजार हेक्टरवरील पिकांचे नुकसान झाल्याचा प्राथमिक अंदाज प्रशासनाने व्यक्त केला आहे. 

हेही वाचा - आमदार श्यामसुंदर शिंदे कोरोना बाधित, मुंबई येथील बॉम्बे हॉस्पिटलमध्ये दाखल

सहा महसूल मंडळात अतिवृष्टी
मागील दोन दिवस काहीसा मंदावलेला पाऊस शुक्रवारी (ता. २७) पुन्हा जोरदार झाला. यामुळे नायगाव तालुक्यात सरासरी ६५.३० मिलीमीटर पावसाची नोंद झाली. तसेच मुखेड मंडळात ६६.२५ मिलीमीटर, मालेगाव (ता. देगलूर) - ६६.५०, बाऱ्हाळी (ता. मुखेड) ६५.२५, नायगाव तालुक्यातील कुंटूर - ६५.२५, नरसी - ६५.२५, मांजरम - ९०.५० अशा सहा महसूल मंडळात अतिवृष्टीची नोंद झाली. शनिवारी (ता. २६) सकाळी आठपर्यंत जिल्ह्यात सरासरी १५.१० मिलीमीटर पाऊस झाला. 

पावसाने ओलांडली सरासरी
शनिवारी जिल्ह्यात पावसाने चार महिन्याची सरासरी ओलांडली. जिल्ह्यात ता. एक जून ते ता. ३१ सप्टेंबर या चार महिन्यात सर्वसाधारण ७८९.२० मिलीमीटर पाऊस पडणे अपेक्षीत असते. या तुलनेत शनिवारपर्यंत (ता. २६) ८०३.६० मिलीमीटर पावसाची नोंद झाली आहे. यामुळे पावसाने चार महिन्याची  सरासरी ओलांढत १०१.८२ टक्के पावसाची नोंद झाली आहे.

हेही वाचलेच पाहिजे - राष्ट्रीय स्वयंसेवक संघाचे ज्येष्ठ स्वयंसेवक डॉ. प्रभाकर पुरंदरे नांदेडमध्ये निधन

तालुकानिहाय झालेला पाऊस
शनिवारी (ता. २६) सकाळी आठ वाजेपर्यंत झालेला तालुकानिहाय पाऊस पुढीलप्रमाणे (कंसात एकूण पाऊस) नांदेड - ४.३ (७९४), बिलोली - ६.९ (८३१.५०), मुखेड - ३३.३० (८८९.१०), कंधार - २१.९० (७४९.९०), लोहा - ५.१० (७५१.४०), हदगाव - १०.५० (८४६.६०), भोकर - शून्य (८५१.७०), देगलूर - ४४.१० (८५५), किनवट - ४.९० (७४८.३०), मुदखेड - ३.६० (७९३), हिमायतनगर - ४.७० (८२३.५०), माहूर - शून्य (७२३.१०), धर्माबाद - १.५० (८२४.७०), उमरी - ६.३० (८०८.३०), अर्धापूर - शून्य (८१६.८०), नायगाव - ६५.३० (७५५.८०).


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Nanded district received above average rainfall of 101.82 per cent, Nanded news