उत्तर प्रदेशच्या कामगाराचा नांदेडात शॉक लागल्याने मृत्यू

नांदेड : येथील भाऊराव चव्हाण सहकारी साखर कारखाना देगाव येथे कामासाठी आलेल्या उत्तर प्रदेशातील एका युवकास विद्युत शॉक लागल्याने त्याचा मृत्यू झाला. ही घटना ता. २१ नोव्हेंबरच्या सायंकाळी सातच्या सुमारास कारखाण्यावर घडली. या प्रकरणाची नोंद बारड पोलिस ठाण्यात करण्यात आली आहे.

याबाबत अधिक माहिती अशी की, उत्तर प्रदेशमधील ब्रहानपूर जिल्ह्यातील अकबरपुर तालुक्यात ग्रामपटहेड खजुरी येथील अदनान खान अल्ताफ खान (वय २०) हा आपल्या इतर सहकार्‍यांसह भाऊराव चव्हाण सहकारी साखर कारखाना देगाव, तालुका अर्धापूर येथे कामासाठी आला होता. ता. २१ नोव्हेंबर च्या सायंकाळच्या सुमारास तो आपल्या इतर साथीदारांसह कारखान्यावर वेल्डिंगचे काम करत असताना त्याला जोराचा विद्युत शॉक लागला. व यात तो गंभीर भाजला गेला. कारखाना प्रशासन व सहकाऱ्यांनी तात्काळ त्याला नांदेडच्या शिवाजीनगर परिसरातील एका खासगी रुग्णालयात दाखल केले. मात्र विद्युत शॉक जबर लागल्याने त्याचा जागेवरच मृत्यू झाल्याचे रुग्णालय सूत्रांनी सांगितले. या प्रकरणाची माहिती अजीम रहमान लतीफ रहमान या त्याच्या नातेवाईकांनी पोलिसांना दिल्यानंतर बारड पोलिस ठाण्यात आकस्मिक मृत्यूची नोंद करण्यात आली आहे. तपास पोलिस हवालदार श्री कारंजकर करत आहेत.

हेही वाचा -  नांदेड : पत्नीला जिवंत जाळणाऱ्या पतीस जन्मठेपेची शिक्षा -

विवाहितेचा छळ 

नांदेड शहराच्या विमानतळ पोलिस ठाण्याच्या हद्दीत असलेल्या सावित्रीबाई फुलेनगर येथील एका विवाहितेस माहेरहून एक लाख रुपये घेऊन ये म्हणून तिचा मानसिक व शारीरिक छळ करणाऱ्या सासरच्या मंडळीविरुद्ध विमानतळ पोलिस ठाण्यात गुन्हा दाखल करण्यात आला आहे. हा प्रकार जानेवारी २०१२ पासून ता. एक जानेवारी २०१३ पर्यंत सतत सुरु असल्याने या छळाला कंटाळून अखेर या पीडित विवाहितेने विमानतळ पोलिस ठाण्यात दिलेल्या फिर्यादीवरुन सासरच्या मंडळीविरुद्ध विविध कलमान्वये गुन्हा दाखल करण्यात आला आहे. तपास सहाय्यक पोलिस फौजदार श्री वाघमारे करत आहेत.

जनावर चोरी 

मनाठा पोलिस ठाण्याच्या हद्दीत ता. २६ नोव्हेंबर ते ता. २७ नोव्हेंबरच्या दरम्यान शिबदरा शिवारातील एका आखाड्यावर बांधलेले दोन बैल बांधून अज्ञात चोरट्यांनी चोरुन नेले. ता. २७ नोव्ंहेबरच्या सकाळी ही बाब उघडकीस आली. या प्रकरणी काशिनाथ यांच्या फिर्यादीवरून मनाठा पोलिस ठाण्यात अज्ञात चोरट्यांविरुद्ध चोरीचा गुन्हा दाखल करण्यात आला आहे. तपास पोलिस हवालदार श्री. पवार करत आहेत.