कोरोना कामातून वगळ्याण्याची अंगणवाडी कर्मचाऱ्यांची मागणी

गडहिंग्लज : कोरोनाला रोखण्यासाठी शासनाने "माझे कुटुंब माझी जबाबदारी' मोहीम हाती घेतली आहे. त्याची जबाबदारी अंगणवाडी कर्मचाऱ्यांवर सोपविली आहे. मात्र, ही जबाबदारी सांभाळत नियमित काम करणे अशक्‍य आहे. त्यामुळे अंगणवाडी कर्मचाऱ्यांना माझे कुटुंब माझी जबाबदारी या मोहिमेतून वगळावे, अशी मागणी अंगणवाडी कर्मचारी सभेने केली. येथील बालविकास प्रकल्प अधिकाऱ्यांना याबाबतचे निवेदन देण्यात आले. 

अंगणवाडी कर्मचाऱ्यांना आहार वाटप, लसीकरण, वजने घेणे, गृहभेटी, पालकांच्या ग्रुपवरून मार्गदर्शन, शक्‍य तिथे मुलांशी संवाद, सीएएसवर फोटो व माहिती अपलोड करणे आदी कामे आहेत. त्यामुळे माझे कुटुंब माझी जबाबदारी मोहिमेत सहभागी करून घेऊ नये, अशी विनंती केली होती. मात्र, तरीही या मोहिमेची जबाबदारी अंगणवाडी कर्मचाऱ्यांवर दिली आहे.

हे काम केल्यानंतर मुलांना, स्तनदा, गरोदर मातांना संसर्ग होईल, याचा विचार करून माझे कुटुंब माझी जबाबदारीतून अंगणवाडी कर्मचाऱ्यांना वगळावे. अन्यथा 21 सप्टेंबरपासून नियमित कामाव्यतिरिक्त अन्य कामात सहभागी होणार नाहीत, असे निवेदनात नमूद केले आहे. 

बालविकास प्रकल्प अधिकारी आनंद गजगेश्‍वर यांनी निवेदन स्वीकारले. अंगणवाडी कर्मचारी सभेचे राज्य संघटक बाळेश नाईक, तालुकाध्यक्षा अंजना जाधव-शारबिद्रे, राजश्री बाबन्नावर, सुरेखा गायकवाड, मालुताई केसरकर आदींच्या निवेदनावर स्वाक्षऱ्या आहेत.

संपादन - सचिन चराटी