कोवाडला बस सेवा विस्कळीत

अशोक पाटील
शनिवार, 15 फेब्रुवारी 2020

गेल्या अनेक दिवसांपासून कोवाड परिसरातील एसटीच्या बसफेऱ्या विस्कळीत झाल्या आहेत. याचा सर्वाधिक फटका महाविद्यालयीन विद्यार्थ्यांना बसला आहे. पासधारक विद्यार्थ्यांचे तर शैक्षणिक नुकसानीसह आर्थिक नुकसानही होत आहे.

कोवाड : गेल्या अनेक दिवसांपासून कोवाड परिसरातील एसटीच्या बसफेऱ्या विस्कळीत झाल्या आहेत. याचा सर्वाधिक फटका महाविद्यालयीन विद्यार्थ्यांना बसला आहे. पासधारक विद्यार्थ्यांचे तर शैक्षणिक नुकसानीसह आर्थिक नुकसानही होत आहे. 18 फेब्रुवारीपासून बारावीच्या बोर्ड परीक्षेला सुरवात होणार आहे. कोवाड केंद्रावर परिसरातील पाचशे विद्यार्थी परीक्षेला प्रविष्ठ झाले आहेत. त्यामुळे परीक्षा काळात बस सेवा सुरळीत राहील का, असा प्रश्‍न विद्यार्थी विचारत आहेत. 

कोवाड परिसरात सतत बस फेऱ्या विस्कळीत होत असल्याने विद्यार्थी व पालकांच्या तक्रारी वाढल्या आहेत. गेल्या महिन्याभरापासून कोवाड परिसरातील महाविद्यालयीन विद्यार्थ्यांचा अनुभव घेत आहेत. अचानक बस सेवा विस्कळीत होत असल्याने विद्यार्थ्यांना त्रास सहन करावा लागला आहे. आगार प्रमुखांना याबाबत कळवूनही त्याची गांभिर्याने दखल घेतली नसल्याने विद्यार्थी व पालकांच्यातून रोष व्यक्त होत आहे.

आता 18 फेब्रुवारीपासून बारावीच्या बोर्ड परीक्षा सुरू होत असल्याने बाहेर गावाहून येणाऱ्या विद्यार्थ्यांना वेळेवर बस सेवा देण्याची गरज आहे. बस वेळेवर आल्या नाहीत तर आपण वेळेवर परीक्षा केंद्रावर पोहोचणार नसल्याची भिती विद्यार्थ्यांत आहे. त्यामुळे पालक व विद्यार्थ्यांनी मुख्याध्यापकांच्याकडे बस सेवा सुरळीत करण्याबाबत मागणी केली आहे.

त्याअनुषंगाने कोवाड येथील बारावीच्या केंद्राचे केंद्र प्रमुख प्रा. एस. डी. सावंत यांनी आगार प्रमुखांना परीक्षा काळात बस सेवा नियमित सुरू ठेवावी, अशी लेखी मागणी केली आहे. कोवाड येथे बारावीच्या परीक्षेचे केंद्र आहे. येथे परिसरातील पाचशे विद्यार्थी परीक्षेला प्रविष्ठ झाले आहेत. यातील बहुतांशी विद्यार्थी बाहेरगावचे असल्याने त्यांना बसची गरज आहे. पण या भागातील बस सेवा सतत काही ना काही कारणास्तव विस्कळीत केली जाते. त्याचा प्रवाशांना त्रास सहन करावा लागतो. 

बस सेवा अचानक बंद 
नियमित मार्गावर असलेल्या बसही अचानक बंद केल्या जातात. काही अन्य मार्गाने वळविल्या जातात. पण याची प्रवाशांना माहितीही नसते. शालेय विद्यार्थी मात्र बसची वाट पाहत दिवसभर ताटकळत थांबतात. त्यामुळे विद्यार्थ्यांना परीक्षा काळात अशा अचानक बस रद्द केल्या, तर आपली अडचण होईल. आपल्याला परीक्षा केंद्रावर वेळेवर पोहोचता येणार नाही, अशी भिती वाटते. त्यामुळे आगार प्रमुखांनी बस सेवा सुरळीत करून प्रवाशांची गैरसोय दूर करावी, अशी मागणी होत आहे. 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Bus Service Disrupted In Kowad Kolhapur Marathi News

टॅग्स