कोल्हापुरात चेन स्नॅचर पुन्हा सुसाट

कोल्हापूर : महिलांनो दागिने घालताय तर सावध रहा, असे म्हणण्याची वेळ आली आहे. लग्नसराईत चेन स्नॅचर शहरात पुन्हा सक्रिय झाले आहेत. भरदिवसा एकाच दिवशी दोन ठिकाणी हात मारून त्यांनी झलकही दाखवून दिली आहे. 

सकाळी व सायंकाळी फिरायला जाणाऱ्या महिला घराबाहेर पडतात. बाजारहाट करण्यासाठीही जातात. तेव्हा दागिने घालूनच त्या जातात. त्यावेळी काही क्षणात हात मारला असता हजारो रुपयांचे दागिने लंपास होऊ शकतात. अवघ्या क्षणातील ही कमाई अनेकांना मोहीत करणारी आहे. यातूनच भरधाव वेगाचा आधार घेणारे काही चोरटे हात मारून जाता जाता दागिने हिसकावतात. चोरीचे दागिने विकत घेणारी यंत्रणाही स्वतंत्ररित्या त्यांनी हेरून ठेवली असते. 

दिवाळी, नाताळ सुटीदरम्यान शहर परिसरात पर्यटकांची संख्या वाढते. नाताळ पाठोपाठ 31 डिसेंबरचा आनंद लुटण्यासाठी शहरात मोठ्या प्रमाणावर पर्यटक येतात. अंबाबाई मंदिर, रंकाळा, जोतिबा मंदिर, पन्हाळा आदी ठिकाणी त्यांची गर्दी दिसू लागली आहे. याचकाळात लग्नसराईही सुरू झाली आहे. पर्यटकासाठी आलेल्या महिलांच्या आणि लग्न समारंभात सहभागी होणाऱ्या महिलांच्या अंगावरील सोन्याच्या दागिन्यावर डोळा ठेऊन मोटारसायकल चोरटे पुन्हा सक्रिय झाले आहेत. भरदिवसा दोन दिवसापूर्वी शहरातील गजबजलेल्या रमणमळा येथील महिलेच्या गळ्यातील सोन्याचे दागिने दोघा मोटारसायकलस्वार चोरट्याने पळविले. काही अंतराने राजेद्रनगर परिसरात एका मोपेडस्वार चोरट्याने महिलेच्या गळ्यातील दागिने हिसकावून नेले. दोन्ही प्रकारात चोरट्याच्या पाच तोळ्यांचे दागिने लुटून नेले. 
प्राथमिक तपासात हे चोरटे 20 ते 25 वयोगटांतील असल्याची माहिती पुढे आली. या कृत्यामागे स्थानिक लुटारूसह इराणी टोळीचा हात असल्याचा संशय बळावला आहे. जोपर्यंत हे लुटारू हाती लागत नाही तोपर्यंत आम्ही दागिने घालायचे की लॉकर्समध्येच ठेवायचे असा सवाल महिलावर्गांतून विचारणा केली जात आहे.