ऊस तोडणीसाठी सात कोयते पुरवितो म्हणत शेतकऱ्याला घातला चार लाखांचा गंडा 

चंदगड (कोल्हापूर) :  ऊस तोडणीसाठी सात कोयते पुरवितो असे सांगून सदारवाडी (ता. चंदगड) येथील परशराम नारायण सदावर यांची 3 लाख 98 हजार रुपयांची फसवणूक केल्याप्रकरणी चंदगड पोलिसांत पोपट दैवत घाडगे (ढाकेफळ, ता. केज जि. बीड) याच्यावर फसवणुकीचा गुन्हा दाखल झाला आहे. 

2019-20च्या हंगामासाठी परशराम सदावर यांच्या ट्रॅक्‍टरवर सात कोयते पुरवितो म्हणून घाडगे यांनी सदावर यांच्याकडून 4 लाख 10 हजार रुपये धनादेशाद्वारे घेतले होते. घाडगे यांनी पैसे घेतले मात्र मजूर पाठविले नाहीत. सदावर यांनी त्यांच्याकडे वारंवार पैशाची मागणी केली; पण पैसे मिळाले नाहीत. मात्र 2020-21 च्या हंगामात कोयते पाठविण्याचे आश्‍वासन दिले. त्यानंतर सदावर यांनी पुन्हा घाडगेना 1 लाख रुपये दिले. 

हेही वाचा- आजऱ्यात वळवाच्या पाऊसाची एंट्री ; घरांची उडाली छपरेसह कौले

घाडगेंना एकूण 5 लाख 10 हजार रुपये पोहचल्याचा सदावर यांनी लेखी करारपत्र केले. तोडणी हंगाम सुरू झाल्यानंतर सदावर टोळी आणण्यासाठी घाडगे यांच्याकडे गेले. त्या वेळी पुन्हा सदावर यांनी त्यांना 80 हजार रोख दिले. करारपत्रात ठरल्याप्रमाणे घाडगे यांनी सात कोयते न देता चार कोयते दिले. या चार कोयत्यांनी केवळ दोन महिने काम केले. हंगाम अर्धवट असताना व दिलेली पूर्ण रक्कम परतफेड करण्यापूर्वीच घाडगे व त्यांचे तोडणी मजूर पळून गेल्याने सदावर यांनी आपली फसवणूक झाल्याची तक्रार पोलिसांत केली आहे.  

संपादन - अर्चना बनगे