तापसदृश साथीमुळे आजऱ्यात 126 घरांची तपासणी

आजरा : आजरा शहरात तापसदृश साथीचे रुग्ण आढळत आहेत. त्यामुळे आरोग्य यंत्रणेने शहरात सर्वेक्षण मोहीम राबविली आहे. डेंगीचे रुग्ण आढळत असल्याची चर्चा शहर परिसरात असल्याने आरोग्य यंत्रणेकडून पुरेपूर खबरदारी घेतली जात आहे. गेले चार दिवसांत 126 घरांची तपासणी करण्यात आली. नागरिकांनी कोरडा दिवस पाळावा, असे आवाहन आरोग्य यंत्रणेने केले आहे. 

शहरात आमराई गल्ली परिसरात तापसदृश साथ पसरली आहे. अनेक जण आजारी पडल्यामुळे सरकारी व खासगी दवाखान्यात उपचार घेत आहेत. या चार दिवसांत शहरातील 126 घरांची तपासणी केली आहे. 1116 नागरिकांची तपासणी करण्यात आली आहे. यामध्ये तापाचे रुग्ण आढळले नाही. या वेळी पाणी साठवणाऱ्या टाकींची तपासणी करण्यात आली. यामध्ये तीन हौदात डेंगीच्या अळ्या सापडल्या.

यामध्ये अबेटिंग टाकण्यात आले. हौदाची तपासणी, परिसर स्वच्छता व वैयक्तिक स्वच्छतेबरोबर गटारी वाहते करण्यास नागरिकांना आवाहन करण्यात आले. आरोग्य कर्मचारी व आशा गटप्रर्वतक यांनी सर्वेक्षणमध्ये सहभाग घेतला. या वेळी आरोग्य विषयक सूचना दिल्या. तालुका आरोग्य अधिकारी डॉ. यशवंत सोनवणे, विस्तार अधिकारी ए. जी. काटकर, आरोग्य सहायक जनार्दन भोयीर, जे. एच. साबखान, प्रशांत चौधरी यांच्या मार्गदर्शनाखाली मोहीम झाली. 

"आरोग्य'कडून नगरपंचायतीला पत्र 
आजरा शहरातील आमराई गल्ली, चर्मकार गल्ली व विठ्ठल मंदिर परिसरात तापाचे रुग्ण आढळून येत आहेत. ही बाब गंभीर आहे. त्यामुळे साथ उद्‌भवण्याची शक्‍यता नाकारता येत नाही. यासाठी विविध उपाययोजनांची अमलबजावणी नगरपंचायतीने करावी, असे पत्र आरोग्य विभागाकडून नगरपंचायतीला दिले आहे. 

संपादन - सचिन चराटी

kolhapur