जोतिबा चैत्र यात्रा भाविकाविनाच ; डोंगर पडला ओस....

जोतिबा डोंगर - दख्खनचा राजा श्री जोतिबा देवाच्या चैत्र यात्रेचा आज मुख्य दिवस. डोंगरावर आज गगनाला भिडणाऱ्या, खांद्यावर डोलणाऱ्या रंगीबेरंगी सासनकाठया कोठेही दिसत नाहीत. हलगी, पिपाणी, ढोल - तासे, सनई या वाद्यांचा आवाज कोठून ही येत नाही. गुलालाने माखलेले भाविक दिसत नाहीत. चांगभलचा जयघोष ऐकू येत नाही. आजच्या यात्रेच्या मुख्य दिवशी आख्खा डोंगर पूर्णपणे शांतच आहे. याचे कारण म्हणजे  कोरोना व्हायरसचे थैमान आणि या पार्श्वभूमीवर प्रशासनाने घेतला लॉकडाऊन चा निर्णय होय. जोतिबा डोंगरावर कालपासून तीन दिवस कडक संचारबंदी लागू करण्यात आली असून डोंगराकडे येणाऱ्या कुशीरे पोहाळे,  गिरोली, दाणेवाडी या भागातील वाटाही पूर्णपणे बंद करण्यात आल्या आहेत. 

कालपासून डोंगरावर सर्वत्र कडक सुरक्षा व्यवस्था तैनात करण्यात आली आहे. दरम्यान , आज पहाटे पाच वाजता मुख्य मंदिरात शासकीय अभिषेक झाला. पन्हाळ्याचे तहसीलदार रमेश शेंडगे यांच्या हस्ते हा अभिषेक झाला. यावेळी उपसरपंच शिवाजीराव सांगळे, देवस्थान समितीचे अधीक्षक महादेव दिंडे, व काही मोजकेच पुजारी उपस्थित होते. सकाळी आठ वाजता राजेशाही थाटातील आकर्षक महापूजा बांधण्यात आली. ही पूजा दहा गावकर व पुजाऱ्यांनी बांधली. यंदा चैत्र यात्रेचा सोहळा १२१ वर्षानंतर भाविकांवीना  होत आहे. या पूर्वी १८९९ मध्ये प्लेगच्या साथीमुळे डोंगरावर चैत्र यात्रा झाली नव्हती. यंदा या यात्रेत भाविकांना येण्यास प्रशासनाने बंदी घातली आहे. त्यामुळे डोंगर आज ओस वाटत आहे.डोंगरावर चिट पाखरू ही दिसत नाही.