शेतकरी संतप्त: पेटलेला ऊस टाकला पालिकेसमोरच

मुरगूड (कोल्हापूर) : येथील वेदगंगा नदीला लागून असलेल्या दत्तमंदिराजवळील जवळपास तीस एकरांतील उसाला आग लागली. यात शेतकऱ्यांचे चाळीस लाखांचे नुकसान झाले. सूरज मधुकर मोरबाळे यांच्या सात एकर उसासह ठिबक सिंचनची लाखो रुपयांची पाईप खाक झाली. दरम्यान, ऊस जळाला असताना नगरपरिषदेने वेगवेगळी कारणे सांगत बंब न पाठवल्याने संतप्त शेतकऱ्यांनी मुख्याधिकारी, नगराध्यक्ष व उपनगराध्यक्षाच्या दालनाबाहेर जळालेला ऊस टाकला.

नदीजवळ सुरज मधूकर मोरबाळे, संतोष सर्जेराव दबडे, धोंडिराम शंकर सुतार, सुहास पांडुरंग दरेकर, शशिकांत चौगले, श्रीकांत चौगले, विलास चौगले, बापूसो चौगले, दिलीप चौगले, अभिषेक चौगले यांच्यासह चेतन मोहिते यांची ऊसशेती आहे. दुपारी दोनच्या दरम्यान सूरज मोरबाळे यांच्या उसाला आग लागली. आणि बघता बघता आगीने चौगले पाणंद परीसरातील जवळपास तीस एकर ऊस कवेत घेतला. कागल नगर परिषद, बिद्री व हमिदवाडा कारखान्याचे बंब पाचारण केले, तसेच सचिन मेंडके यांनी पाण्याचे टॅंकर दिले.

हेही वाचा- गर्भपातास नकार दिल्याने डॉक्‍टरला मारहाण -

दरम्यान, नगरपरिषदेने बंब पाठवून दिला नसल्याने संतप्त शेतकऱ्यांनी मुख्याधिकारी, नगराध्यक्ष व उपनगराध्यक्षाच्या दालनाबाहेर जळालेला ऊस टाकला. वेगवेगळी कारणे देऊन नागरिकांच्या भावनांशी खेळण्याचा प्रयत्न पालिका प्रशासन करत असल्याचा आरोप नुकसानग्रस्त शेतकऱ्यांनी केला. नगराध्यक्ष, उपनगराध्यक्ष, मुख्याधिकाऱ्यांसह एकही नगरसेवक, नगरसेविका उपस्थित नव्हते. त्यामुळे शेतकरी जास्तच आक्रमक झाले. त्यांनी या वेळी ढीम्म प्रशासनाचा निषेध केला. जोपर्यंत मुख्याधिकारी येत नाहीत, तोपर्यंत ऊस काढू नये, अशी भूमिका शेतकऱ्यांनी घेतली. मुरगूड पोलिसांनी बंदोबस्त ठेवला होता. संतोष वंडकर, दगडू शेणवी, पै. प्रकाश चौगले, गुरुदेव सूर्यवंशी, संदीप भारमल, सुरज मोरबाळे, दिग्विजय चव्हाण आदींसह नुकसाग्रस्त शेतकरी उपस्थित होते.

उसाला लगेच तोड
जळालेला ऊस तत्काळ टोळ्या पाठवून देऊन युद्ध पातळीवर तोडून नेण्याच्या सूचना ग्रामविकासमंत्री हसन मुश्रीफ यांनी दिल्याने संताजी घोरपडे कारखान्याच्या चार टोळ्या दाखल झाल्या आहेत.

यापूर्वी पालिकेच्या अग्निशामक बंबाच्या तत्काळ सेवा दिल्या आहेत; मात्र १५ दिवसांपासून बंबाचे इंजिन बंद आहे. त्याची बांधणी सोलापूरमध्ये केली होती. याची दुरुस्ती होत नाही. त्यामुळे लवकरच नागरिकांच्या सेवेमध्ये पर्यायी गाडी ठेवणार आहे.
संजय गायकवाड, मुख्याधिकारी

संपादन अर्चना बनगे