वाहव्वा..! पंढरपूर तालुक्‍यात ‘तरुण’ पावसाची जबरदस्त एन्ट्री..! 

रोपळे बुद्रूक (सोलापूर) : पंढरपूर शहर व परिसरात शुक्रवारी (ता. 9) पुनर्वसू नक्षत्रातील तरुण पावसाची जबरदस्त एंट्री झाली. तालुक्‍यात सरासरी 23 मिलिमीटर पाऊस पडला असला तरी करकंब, पटवर्धन कुरोली व भाळवणी या तीन मंडळात मुसळधार पाऊस पडला. त्यामुळे या मंडळात ओढे व नाले भरून वाहिल्याने शेताच्या तालीही फुटल्या आहेत. तरुण पावसाने चांगली हजेरी लावल्यामुळे शेतकऱ्यांच्या आशा पल्लवीत झाल्या आहेत. या पावसात नागरिकांनी गरमागरम भजी, वडापाव व सामोशावर ताव मारला. 

हेही वाचा : माळशिरस तालुक्‍यात बाजरी पेरणीला शेतकऱ्यांचे प्राधान्य 

पंढरपूर तालुक्‍यात यंदा कमीअधिक प्रमाणात सुरवातीपासूनच चांगला पाऊस पडत गेला. गेल्या अनेक वर्षांनंतर मृग नक्षत्राच्या पावसाची सर्वदूर हजेरी लागली होती. या पावसामुळे शेतकऱ्यांनी खरीप हंगामाचे चांगले नियोजन केले होते. शेतकऱ्यांची खरिपातील पिकांच्या पेरणीची कामे आता अंतिम टप्प्यात आली आहेत. अशा परिस्थितीत रोपळे व परिसरातील आढीव, विसावा, पांढरेवाडी, बाभूळगाव व मेंढापूर या परिसरात सुमारे एक ते दीड तास जोरदार पाऊस पडला. गुरुवारी सायंकाळी साडेपाचच्या सुमारास सुरवात झालेल्या पावसाने दीड तास झोडपून काढले. या पावसामुळे ओढे भरून वाहू लागले आहेत. शेताच्या तालीही फुटल्या आहेत. खरिपात पेरलेली कडधान्ये व तृणधान्याची पिके पाण्याखाली गेल्याचे चित्र दिसून आले. शेतातून पाणी निघाल्याचे चित्र अनेक दिवसांनंतर पाहायला मिळाले. 

हेही वाचा : सोलापूर जिल्ह्यात यंदा उसाचे बंपर पीक; 150 कोटी मेट्रिक टन ऊस गाळपासाठी मिळणार 

तरुण पाऊस का म्हणतात? 
पुनर्वसू नक्षत्रातील पहिल्या चरणात पडणाऱ्या पावसाला ग्रामीण भागात तरुण पाऊस म्हणून ओळखतात. पंढरपूर तालुक्‍यात गुरुवारी सर्वात जास्त पाऊस पटवर्धन कुरोली मंडळात 46 मिलिमीटर पडला. तर पळूज मंडळात सर्वात कमी नऊ मिलिमीटर इतक्‍या पावसाची नोंद झाली. 

मंडळनिहाय पाऊस (मिलिमीटरमध्ये) 
करकंब 31, पटवर्धन कुरोली 46, भंडीशेगाव 15, भाळवणी 38, कासेगाव 16, पंढरपूर 20, तुंगत 20, चळे 9, पुळूज 12, सरासरी पाऊस 23 मिलिमीटर 

संपादन : श्रीनिवास दुध्याल