तासगाव तालुक्‍यात नवे 22 रुग्ण; लसीकरण थांबले 

तासगाव : तासगाव तालुक्‍यात कोरोनाची दहशत वाढत असून आज नवे 22 रुग्ण सापडले, 1 एप्रिलपासून आठ दिवसांत 142 कोरोना रुग्ण सापडल्याने तालुका हादरला आहे. ग्रामीण भागात कोरोनाचा मोठ्या प्रमाणात शिरकाव झाल्याचे स्पष्ट झाले आहे. आज तालुक्‍यात कोरोना लसींचा तुटवडा झाल्याने एकही लसीकरण झाले नाही. 

तासगाव शहरात आज कोरोनाने आणखी नवे चार रुग्ण मिळून आले. तासगाव शहरात दररोज कोरोना रुग्ण सापडत आहेत. आज शहरात 4 नवे कोरोना रुग्ण सापडले, तर 1 एप्रिलपासून तासगावात 28 कोरोना रुग्ण सापडले आहेत. तासगाव शहरात कोरोना पुन्हा एकदा पाय पसरताना दिसत आहे. एकीकडे कोरोना वाढत असताना शहरातील गर्दी मात्र कमी होताना दिसत नाही. होम आयसोलेशनमध्ये असलेले रुग्ण निवांत बाजारहाट करताना दिसत आहेत. 

ग्रामीण भागातील आरवडे, बलगवडे, दहिवडी, धुळगाव खूजगाव, विसापूर यमगरवाडी, येळावी येथे प्रत्येकी 1 तर हातनूर वासुंबे नागाव कवठे येथे प्रत्येकी 2, तर जरंडी येथे चार कोरोना रुग्ण असे तालुक्‍यात आज 22 रुग्ण आढळून आले. 1 एप्रिलपासून गेल्या आठ दिवसांत 142 कोरोना रुग्ण आढळून आले आहेत हे सर्वांना गृह अलगीकरण करण्यात आले आहे. तालुक्‍यातील ग्रामीण भागात मोठ्या प्रमाणावर कोरोनाचे रुग्ण सापडत असून प्रतिबंधात्मक उपाय योजना होताना मात्र दिसत नाहीत. 

संपादन : प्रफुल्ल सुतार