जहाँगीरनगर विद्यापीठाशी शिवाजी विद्यापीठाचा करार

कोल्हापूर - ‘जैविक शास्त्रांच्या संशोधनात भारतातील आघाडीच्या विद्यापीठांपैकी असलेल्या शिवाजी विद्यापीठाशी सामंजस्य कराराद्वारे सहकार्य वृद्धी ही अतिशय महत्त्वाची बाब आहे. त्याचा बांगलादेशच्या संशोधक विद्यार्थ्यांना मोठ्या प्रमाणात लाभ होईल,’ अशी भावना ढाका (बांगलादेश) येथील जहाँगीरनगर विद्यापीठाच्या जैवतंत्रज्ञान व जनुकीय अभियांत्रिकी अधिविभागाचे प्रमुख प्रा. डॉ. अब्दुल्ला मोहम्मद शोहेल यांनी येथे व्यक्त केली. 

दोन्ही विद्यापीठांत आज शैक्षणिक व संशोधकीय देवाण-घेवाणीच्या अनुषंगाने सामंजस्य करार झाला. त्यावेळी ते बोलत होते. यावेळी शिवाजी विद्यापीठाचे कुलसचिव डॉ. विलास नांदवडेकर आणि डॉ. शोहेल यांनी सामंजस्य करारावर स्वाक्षरी केल्या.

डॉ. शोहेल म्हणाले, ‘‘शिवाजी विद्यापीठाचा जैवतंत्रज्ञान, तसेच सूक्ष्मजीवशास्त्र अधिविभाग हे आधुनिक संशोधनामध्ये अग्रेसर आहेत. त्याचप्रमाणे जहाँगीरनगर विद्यापीठाचा बांगलादेशमध्ये बायोसेफ्टी व सिक्‍युरीटी, मॉलेक्‍युलर बायोटेक्‍नॉलॉजी या विषयांच्या संशोधनात मोठा लौकिक आहे. या दोन संस्थांनी परस्पर सहकार्यातून संयुक्त संशोधन प्रकल्पांसह फॅकल्टी-स्टुडंट एक्‍स्चेंज प्रोग्रॅम असे विविध उपक्रम राबविल्यास या क्षेत्रात भरीव स्वरूपाचे संशोधनकार्य करता येईल.’’

यावेळी विद्यापीठाच्या इनक्‍युबेशन, इनोव्हेशन व लिंकेजीस कक्षाचे संचालक डॉ. आर. के. कामत, आंतरराष्ट्रीय कक्षाचे संचालक डॉ. ए. व्ही. घुले यांनी शिवाजी विद्यापीठाच्या वाटचालीविषयी अवगत केले.

विद्यापीठाच्या सूक्ष्मजीवशास्त्र विभागाचे समन्वयक डॉ. के. डी. सोनवणे यांनी प्रास्ताविक केले, तर प्राणीशास्त्र अधिविभागाचे डॉ. माधव भिलावे यांनी आभार मानले. अधिष्ठाता डॉ. ए. एम. गुरव, डॉ. डी. के. गायकवाड आदी उपस्थित होते.

शैक्षणिक आदान-प्रदानास चालना
शिवाजी विद्यापीठाचे प्र-कुलगुरू डॉ. डी. टी. शिर्के म्हणाले, ‘‘सामंजस्य करार केवळ दोन विद्यापीठांच्याच नव्हे, तर दोन्ही देशांच्या दृष्टीनेही अत्यंत महत्त्वाचा आहे. अशा प्रकारच्या सामंजस्य करारांतून भारतीय उपखंडातील संशोधन व शैक्षणिक आदान प्रदानास चालना मिळणे ही सौहार्द वृद्धीच्या दृष्टीने अतिशय चांगली बाब आहे. केवळ या विषयांच्याच नव्हे, तर अन्य विद्याशाखांच्या संशोधक, शिक्षक, विद्यार्थ्यांत ज्ञानाचे आदान-प्रदान होणे आवश्‍यक आहे.’’