श्रीक्षेत्र पैठण येथील संत एकनाथ महाराजांच्या पालखी मार्गाची दुरावस्था

करकंब (जि.सोलापूर) : पंढरीच्या आषाढी वारीत मानाचे तीन नंबरचे स्थान असणाऱ्या श्रीक्षेत्र पैठण येथील संत एकनाथ महाराजांच्या पालखी मार्गाकडे प्रशासनाचे दुर्लक्ष असून अनेक ठिकाणी या मार्गावर खडी उचकटली आहे. त्यामुळे सध्या तरी नाथभक्तांसाठी पंढरीची वाट खाचगळग्यांचीच असून येणाऱ्या कालावधीत तरी प्रशासन यात दुरुस्ती करुन नाथांचा वनवास संपविणार का?, हाच खरा प्रश्न आहे.

श्रीक्षेत्र पैठण येथील संत एकनाथ महाराजांच्या पालखीस आषाढी वारीमध्ये तीन नंबरचे महत्वाचे स्थान आहे. तीस हजार हून भाविकांची संख्या असणाऱ्या या पालखी सोहळ्याचा बहुतांश प्रवास ग्रामीण भागातून होतो. मात्र या मार्गावर अनेक ठिकणी रस्त्यांची दुरावस्था झाली असून रस्त्याच्या दुतर्फा काटेरी झुडपे वाढलेली आहेत. याबाबत पालखी सोहळा प्रमूख रघुनाथबुवा गोसावी (पालखीवाले) दरवर्षी शासनाकडे लेखी पाठपुरावा करतात. यावर्षीही त्यांनी पालकमंत्री विजयकुमार देशमूख यांच्याकडे सोलापूर जिल्ह्यात पालखीसोहळ्यास येणाऱ्या अडचणीसंदर्भात निवेदन देवून त्या सोडविण्याची मागणी केली आहे. 

श्रीसंत एकनाथ महारांजांचा पालखी सोहळा अरण येथून करकंब येथे पंढरपूर तालुक्यात प्रवेश करतो. मात्र अरण ते करकंब हद्दीपर्यंतच्या पालखीमार्गाचे गतवर्षी करण्यात आलेले खडीकरण सध्या उचकटले असून रस्ता खडीने माखला आहे. त्यामुळे या मार्गावरुन पालखी सोहळा पुढे जाताना भाविकांना अतिशय त्रास होणार आहे. शिवाय करकंब ते शेवते मार्गावरही अनेक ठिकाणी खड्डे पडले आहेत. हा पालखी सोहळा सोलापूर जिल्ह्यात प्रवेश करायला अजून तीन आठवड्याचा कालावधी आहे. या कालावधीत तरी सोहळाप्रमुखांनी दिलेल्या निवेदनाचा विचार करुन पालखीमार्गाची दुरुस्ती होणार का आणि नाथांचा विठुरायाच्या भेटीतील वनवास संपणार का, हा खरा प्रश्न आहे. 

पालखी सोहळा प्रमूख रघुनाथबुवा गोसावी यांच्या मागण्या -

• कुर्डू येथील गवळवाडी ते शेळके वस्ती दरम्यानच्या रेल्वे रुळावर पूल व्हावा अथवा भुयारी पालखी मार्ग व्हावा. 
• कव्हे ते महादेववाडी दरम्यान भीमा-सीना जोडकालव्यावर पूल व्हावा व्होळे-कौठाळी पुलाजवळ घाट बांधावा. 
• शिरढोण ते जुना अकलूज रोड दरम्यनची काटेरी झुडपे काढून रथ जाईल असा रस्ता तयार करावा. 
• भीमा नदीच्या पैलतीरावरील ६५ एकरात पालखी सोहळ्यास २५ गुंठे जागा मिळावी. 
• निर्मलवारी अंतर्गत पालखी सोहळा मुक्कामाच्या ठिकाणी मोबाईल शौचालय मिळावे. 
• पैठण ते पंढरपूर पालखी मार्गाचे ग्रामीण रस्ते दुरुस्त व्हावेत.
• पालखी मार्गावर पिण्याच्या पाण्याची सोय व्हावी.

  
  
  आपण एका क्लिकवर ताजे अपडेट्स आपल्या मोबाईलमध्येही मिळवू शकता.

• 'ई सकाळ'चे अॅप डाउनलोड करण्यासाठी क्लिक करा.
• शेतीविषयीची अपडेट असलेले 'अॅग्रोवन' अॅप डाउनलोड करण्यासाठी ​क्लिक करा.
• राजकारणाची प्रत्येक घडामोड कळविणारे 'सरकारनामा' अॅप डाउनलोड करण्यासाठी क्लिक करा.