आरपीआय भाजपसोबतच 

कोल्हापूर - आठवले गटाच्या रिपब्लिकन पक्षाने भारतीय जनता पक्षासोबतच राहण्याचा निर्णय घेतला. आज झालेल्या चर्चेत आरपीआयला दोन जिल्हा परिषदेचे व पंचायत समितीचे चार मतदारसंघ सोडण्याचा निर्णय झाला. आरपीआयने आणखी चार जिल्हा परिषद व प्रत्येक तालुक्‍यातील एक पंचायत समितीची जागा मागितली आहे; मात्र जागावाटपावरून आघाडीमध्ये कोणताही बदल होणार नाही, असे आरपीआयचे पश्‍चिम महाराष्ट्र अध्यक्ष प्रा. शहाजी कांबळे यांनी सांगितले. 

दोन दिवसांपूर्वी पालकमंत्री चंद्रकांत पाटील यांनी स्वाभिमानी शेतकरी संघटना, जनसुराज्य शक्‍ती व आरपीआच्या नेत्यांशी चर्चा केली. या वेळी आरपीआयने भाजपसोबत राहण्यास सकारात्मक प्रतिसाद दिला. आज जागावाटपाबाबत चर्चा झाली. या चर्चेत पहिल्या टप्प्यात आरपीआयला सांगरूळ (ता. करवीर) व सरवडे (ता. राधानगरी) हे जिल्हा परिषदेचे दोन मतदारसंघ व चंदगड, गडहिंग्लज, गारगोटी (ता. भुदरगड) व भादवण (आजरा) हे पंचायत समितीचे चार गण देण्याचा निर्णय झाला. याशिवाय आरपीआयने उचगाव गटाचीही मागणी केली आहे. स्वाभिमानी शेतकरी संघटना आघाडीतून बाहेर पडल्यामुळे उदगाव (ता. शिरोळ), किणी (ता. हातकणंगले) व परिते (ता. करवीर) या जिल्हा परिषद मतदारसंघांची मागणी केली आहे. याबाबत पुन्हा चर्चा करण्यात येणार आहे.