खुनातील संशयित सुटल्यावरून लक्षतीर्थ वसाहतीत दोन गटांत हाणामारी

कोल्हापूर - लक्षतीर्थ वसाहत येथील पिंटू मिसाळ खूनप्रकरणातील संशयित सुटल्यानंतर दोन गटांत काल सायंकाळी जोरदार हाणामारी झाली. काठ्या, विटांसह दगडांचा वापर करत दोन्ही गटांनी वाहनांची तोडफोड केली. हाणामारीत दोघे जखमी झाले.

अचानक घडलेल्या या प्रकरामुळे परिसरात तणावाचे वातावरण निर्माण झाले होते. घटनास्थळी लक्ष्मीपुरी पोलिसांनी धाव घेऊन परिस्थिती नियंत्रणात आणली. रात्रभर येथे पोलिस बंदोबस्त होता. याबाबत गुन्हा दाखल करण्याचे काम रात्री उशिरापर्यंत सुरू होते. 

लक्षतीर्थ वसाहत येथील पिंटू मिसाळ यांचा २०१० मध्ये पंचगंगा घाटाजवळील शेतात खून झाला होता. या प्रकरणातील काही संशयितांना जिल्हा न्यायालयाने शिक्षा सुनावली होती. त्यातील काही जणांनी उच्च न्यायालयात धाव घेतली होती. त्यातील काहीजण आज बाहेर आले. त्यांनी आपल्या समर्थकांसह आज सायंकाळी सातच्या सुमारास लक्षतीर्थ वसाहत येथे जल्लोष केला. त्याचवेळी त्यांना मिसाळ यांच्या नवव्या पुण्यस्मरणाचा फलक निदर्शनास आला. त्यांनी तो फाडला. त्याशेजारील हातगाडी फोडत याठिकाणी उभ्या असणाऱ्या तरुणांना मारहाण केली. त्यानंतर ते पळून गेले.

दरम्यान, याची माहिती मिसाळ समर्थकांना समजली. ते त्यांना जाऊन भिडले. दोन्ही गटांकडून दगड, विटा, काठ्या व बांबूचा वापर करण्यात आला. दोन्ही गटांनी रस्त्यावर लावलेल्या एका अलिशान मोटारीसह तीन मोटारींची व दोन मोटारसायकलींची तोडफोड केली. केएमटी बसवरही दगडफेक केली. यात वाहनांचे मोठे नुकसान झाले. दगडफेकीत ऋषिकेश खोंदल व राकेश कोळी जखमी झाले, अशी प्राथमिक माहिती तपासात पुढे आल्याचे लक्ष्मीपुरी पोलिस ठाण्याचे पोलिस निरीक्षक वसंत बाबर यांनी सांगितले; पण संबधित संशयित खूनप्रकरणातून निर्दोष की जामिनावर सुटले हे समजू शकले नसल्याचेही त्यांनी सांगितले. दरम्यान, घटनास्थळी पोलिसांनी धाव घेतल्यानंतर दोन्ही गट पसार झाले असून, त्यांचा शोध सुरू आहे. जखमींना सीपीआरमध्ये दाखल केले. 

अलिशान मोटारीचे नुकसान...
शिवाजी पेठेतील सचिन काटकर लक्षतीर्थ वसाहत येथील नातेवाइकांना भेटण्यासाठी आले होते; पण त्यांच्या मोटारीलाही दोन्ही गटांनी लक्ष्य बनवले. मोठमोठे दगड घालून गाडीची तोडफोड करण्यात आली. त्यात मोटारीचे मोठे नुकसान झाले.