आध्यात्मिक राजधानी पंढरपुरात एअर स्ट्राईकचा जल्लोष

पंढरपूर : भारतीय सैनिकांनी पाकवर केलेल्या हल्ल्याचे देशभरात स्वागत आणि जल्लोष साजरा केला जात असतानाच आध्यात्मिक राजधानी पंढरपुरात ही विठ्ठल दर्शनासाठी आलेल्या भाविकांनी व येथील मंदिर परिसरातील व्यापार्यांनी  फटाके फोडून आणि पेढे वाटून आनंदोत्सव साजरा केला.

14 फेब्रुवारी ला पुलवामा येथे पाकिस्तानी दहशतवाद्यांनी बाॅम्ब हल्ला केला होता. यामध्ये 40 हून अधिक भारतीय सैनिक शहीद झाले. भारतीय सैनिकांवर झालेल्या हल्ल्याचा बदला घ्यावी, अशी देशातील सर्वसामान्य जनतेची मागणी होती.

त्यानंतर आज पहाटे भारतीय हवाई दलाच्या जवानांनी  पाकिस्तान मधील  बालाकोट येथील दहशतवादयाच्या तळांवर हवाई हल्ले करून दहशतवाद्यांचा खात्मा केला. उरी हल्ल्यानंतर ही मोठी कारवाई मानली जाते.

भारतीय सैनिकांनी दहशतवादी तळांवर कारवाई केल्याची माहिती मिळताच देशभरात हवाई सैनिकांचे कौतुक केले जात आहे. आज पंढरपुरात विठ्ठल दर्शनासाठी देशभरातून आलेल्या भाविकांनीही मंदिर परिसरात फटाके फोडून आणि पेढे वाटून जल्लोष साजरा केला. यावेळी 'भारत माता की जय...', 'पाकिस्तान मुर्दाबाद..' , 'तोड दो...तोड दो.. पाकिस्तान तोड दो' अशा घोषणा देत भारतीय सैनिकांचे अभिनंदनही केले.

यावेळी राजू कौलवार, अवधूत बडवे, प्रभाकर कौलवार, कौस्तुभ गुंडेवार, गणेश गुंडेवार, चिदंभर गोटेकर, भाऊसाहेब घाटे, अमर श्रीखंडे, विजय सावंत, सौरभ बडवे आदींसह भाविक व नागरिक उपस्थित होते.