सोलापुरात 24 जुलैला होणार होमगार्ड भरती 

सोलापूर : सोलापूर होमगार्ड अंतर्गत पंधरा तालुका पथकांमधील अनुशेष पूर्ण करण्यासाठी 24 जुलैला सोलापूर ग्रामीण पोलिस मुख्यालय येथे सकाळी सात ते 11 वाजेपर्यंत भरती प्रक्रिया राबविण्यात येणार आहे. ही भरती 344 पुरुष आणि 154 महिला होमगार्ड पदासाठी होणार असल्याची माहिती अपर पोलिस अधीक्षक तथा होमगार्डचे जिल्हा समादेशक अतुल झेंडे यांनी बुधवारी पत्रकार परिषदेत दिली. 

सकाळी 11 नंतर येणाऱ्या उमेदवारांना भरती प्रक्रियेत सहभागी करून घेता येणार नाही. नवीन होमगार्ड सदस्य नावनोंदणीबाबतची संपूर्ण माहिती होमगार्ड कार्यालयाच्या संकेतस्थळावर उपलब्ध आहे. माहिती भरून प्रिंट काढून सोबत आणावे. होमगार्ड ही मानसेवी संघटना आहे. यामधील सदस्य हे मानसेवी असतात. त्यांना या संघटनेत कायमस्वरूपी सामावून घेतले जात नाही. उमेदवाराचे शिक्षण कमीतकमी दहावी उत्तीर्ण असावे. 20 ते 50 वयोमर्यादा तसेच पुरुषांकरिता 162 सेंमी, महिलांसाठी 150 सेंमी उंची, पुरुषांसाठी 1600 मीटर, महिलांसाठी 800 मीटर धावणे आणि गोळाफेक आदी मैदानी चाचणी होणार आहेत. 

उमेदवार हे अन्य कार्यालयात काम करीत असतील तर त्यांना त्यांच्या कार्यालय प्रमुखांचे अथवा मालकाचे नाहरकत प्रमाणपत्र द्यावे लागेल, माजी सैनिक अथवा एनसीसी प्रमाणपत्रधारक व अन्य तपशीलासंबंधित प्रमाणपत्र सादर करणे बंधनकारक आहे. उमेदवाराची निवड पूर्णपणे गुणवत्तेवर होणार आहे. प्रतीक्षा यादी प्रसिद्ध केली जाणार नाही, असे श्री. झेंडे यांनी सांगितले.