सात वर्षाच्या मुलावर मोकाट कुत्र्याचा हल्ला

इचलकरंजी - येथील गणेश फौंड्री शेजारील शिकलगार वसाहतीमध्ये सात वर्षाच्या शाळकरी मुलावर मोकाट कुत्र्यांनी अचानक हल्ला केला. त्याच्या शरीराचा चावा घेतला. तसेच त्याला बरेच अंतर कुत्र्यांनी फरफटत नेले. त्यामुळे त्याच्या डोक्याचा भाग सोलला गेला आहे  यात तो मुलगा गंभीर जखमी झाला आहे. त्याला उपचाराकरीता सांगली येथील सरकारी रुग्णालयामध्ये दाखल केले आहे.

शहरातील चिकन 65 आणि बिर्याणी हातगाडीवाले हाडे रस्त्यावर टाकतात. त्यामुळे अशा भागात ही कुत्री मांसासाठी जमा होतात. ही कुत्री आता कळपाने असल्याने नागरिकही त्यांना घाबरतात. त्यातच त्यांचे हल्ले वाढले अाहेत. इचलकरंजी शहरातील  महिन्याभरातील ही तिसरी घटना आहे.

या घटनेत जखमी झालेल्या या मुलाच्या घरची परिस्थिती अत्यंत गरीबीची आहे. हायस्कुलची 700 रुपये फी भरण्याचीही ऐपत नसल्याने, त्याला त्याच्या पालकांनी सरकारी शाळेत घालले आहे.