उसाला जादा ३०० रुपये देताना होणार दमछाक

कोल्हापूर - यावर्षीच्या साखर हंगामात वाढलेली एफआरपी आणि संभाव्य साखर उत्पादन पाहता साखरेचे दर स्थिर राहणे आवश्‍यक आहे. साखरेचे दर स्थिर राहिले तरच एफआरपीपेक्षा प्रतिटन ३०० रुपये जादा देणे कारखानदारांना शक्‍य आहे; पण हे दर कोसळले तर मात्र मागणीप्रमाणे दर देताना कारखानदारांची दमछाक होणार आहे. 

गेल्यावर्षीच्या हंगामात एफआरपी ९.५० रिकव्हरीला २३०० रुपये, तर त्यापुढील प्रत्येक टक्‍क्‍याला २३८ रुपये अशी होती. यावर्षी हाच दर अनुक्रमे २५५० व २६८ रुपये झाला आहे. गेल्या हंगामात बहुतांशी कारखान्यांनी एफआरपीपेक्षा ४०० ते ६०० रुपये जादा दिले आहेत. गेल्या हंगामात शेतकरी संघटना व कारखानदार यांच्यात झालेल्या बैठकीत एफआरपी अधिक १७५ रुपये यावर तोडगा निघाला आहे. 

इचलकरंजीत कृषी राज्यमंत्री सदाभाऊ खोत यांनी नव्याने काढलेल्या रयत क्रांती संघटनेच्या मेळाव्यात एफआरपीपेक्षा प्रतिटन ३०० रुपये जादा देण्याची मागणी केली. श्री. खोत यांची ही मागणी असली तरी ‘स्वाभिमानी’चे खासदार राजू शेट्टी यांची ऊस परिषद २८ ऑक्‍टोबरला होणार आहे. त्यात श्री. शेट्टी किती मागणी करणार यावर दराचे व हंगामाचे चित्र अवलंबून आहे. यावर्षी एफआरपीतच प्रतिटन सुमारे ३०० रुपयांची वाढ झाली आहे. त्यामुळे जिल्ह्यातील कारखान्यांकडून तोडणी-ओढणी वजा जाता २५५६ रुपयांपासून ३ हजारांपर्यंत दर मिळणार आहे.

गेल्यावर्षी राज्यात व देशात साखरेचे उत्पादन फारच कमी झाले होते. त्यामुळे आज साखरेचे प्रति क्विंटल दर ३५२५ ते ३५५० पर्यंत स्थिर आहेत. यावर्षी हे उत्पादन दुप्पट होण्याची शक्‍यता आहे. त्याचा परिणाम दरावर होणार आहे. डिसेंबर, जानेवारी व फेब्रुवारीत दर खाली येण्याची भीती आहे. साखर उत्पादनाच्या अंदाजावर हे दर अवलंबून आहेत. त्यामुळे एफआरपीपेक्षा प्रतिटन ३०० रुपये जादा दर देण्यात सद्यःस्थितीत अडचण नसली तरी भविष्यात साखरेचे दर गडगडले तर मात्र कारखानदारांची दमछाक निश्‍चित आहे. 

जिल्ह्यातील कारखानानिहाय मिळणारी एफआरपी 
कारखान्याचे नाव   गेल्यावर्षीचा उतारा   एफआरपी   तोडणी वजा करून मिळणरी रक्कम 
शाहू-कागल                  १२.५४             ३३६५                २८३२
मंडलिक-हमीदवाडा         १२.३०              ३३००                २७६५
बिद्री-कागल                 १२.५९              ३३७८                 २८४३
भोगावती-परिते              ११.९३              ३२०१                 २६६६
घोरपडे-कापशी             १२.३१               ३३०२                 २७६८
कुंभी-कुडीत्रे                १२.७६               ३४२४                २८८९
जवाहर-हुपरी               १२.६०               ३३८१                 २८४६
दत्त-शिरोळ               १२.६३                ३३८९                २८५४
शरद-नरंदे                 १२.६०               ३३८१                 २८४६
गुरुदत्त-टाकळी          १३.११                ३५१७                 २९४७
पंचगंगा                   १२.७२               ३४१३                 २८४३
आजरा-गवसे              ११.०५              २९६५                 २४३०
राजाराम-बावडा        १२.०५                 ३२३३                  २६९८
वारणा                  १२.०३              ३२२८                   २६९३
दत्त-दालमिया           १२.७२                ३४१३                  २८३८
गडहिंग्लज               ११.४५               ३०७३                   २५३८
डी. वाय.                १२.२७               ३२९२                   २७५७
गायकवाड-सोनवडे      १२.११               ३२४९                   २७१४
ईको केन                 ११.६१              ३११५                    २५८०
हेमरस                   १२.०३               ३२२८                   २६९३.