कोल्हापूर ते तिरुपती विमानसेवेचे जूनपर्यंतचे बुकिंग फुल्ल

कोल्हापूर - कोल्हापूर ते तिरुपती विमानसेवा नुकतीच सुरू झाली. विमानसेवेला प्रतिसाद वाढत आहे. जूनपर्यंतचे बुकिंग फुल्ल झाले आहे. त्यासोबत बंगळूर व हैदराबादसाठीही बुकिंग होत असल्याची माहिती ‘इंडिगो’ व ‘अलायन्स एअर’ या दोन्ही कंपन्यांतर्फे देण्यात आली. 

दोन दिवसांपूर्वी कोल्हापूर - तिरुपती विमानसेवा सुरू झाली. पहिल्या सहा फेऱ्या हाउसफुल्ल गेल्या आहेत. अजूनही तिरुपतीसाठी बुकिंग सुरू आहे. शालेय सुट्यांचा हंगाम 
असल्याने अनेक जण कुटुंबासह पर्यटनाला जात आहेत. सर्वसामान्य तसेच नोकरी-व्यवसायाच्या निमित्ताने हैदराबादकडे जाणारे नियमित प्रवासी अशा दोन्ही वर्गांचा या विमानसेवेला प्रतिसाद मिळत आहे.  

येत्या १५ जूनपर्यंतचे बुकिंग फुल्ल झाले आहे. त्यापुढील बुकिंगही करण्यात येत आहे. बहुतांश शुक्रवार, शनिवार व रविवार या दिवसांना बुकिंगची मागणी होत आहे. यापूर्वी सुरू झालेल्या कोल्हापूर-बंगळूर या सेवेलाही चांगला प्रतिसाद आहे. यात आयआयटीयन्सची संख्या जास्त आहे.

कोल्हापूर-मुंबई सेवेसाठी प्रयत्न 
‘उडान’ योजनेत कोल्हापूर - हैदराबाद व कोल्हापूर - बंगळूर या मार्गावर पाच महिन्यांपासून विमानसेवा सुरू झाल्या आहेत. यात कोल्हापूर - हैदराबाद मार्गावर इंडिगो कंपनीला तर कोल्हापूर - मुंबई मार्गावर टू जेट व घोडावत ग्रुपच्या स्टार एअरला मंजुरी मिळाली आहे; मात्र मुंबईत स्टॉलची अडचण असल्यामुळे अजून ही सेवा सुरू नाही. ही सेवा सुरू व्हावी, यासाठी प्रयत्न सुरू आहेत; तसेच विमानतळावर नाईट लॅण्डिंगची सेवा सुरू करण्याबाबतचे विमान सेवा प्राधिकरणाचे प्रयत्न सुरू आहेत.

ऑनलाईन आणि थेट विमानतळावरील तिकीटगृहावर तिकीट खरेदी करता येते. ज्येष्ठ नागरिकांपासून गृहिणींपर्यंत सर्वांना विमान प्रवासाची संधी सुलभ बनली आहे.  
- कमलकुमार कटारिया, विमान पत्तन प्राधिकरण अधिकारी

तिकीट काढणे सोपे

•  उजळाईवाडी विमानतळावर ‘इंडिगो’, 
•  ‘अलायन्स एअर’ कंपन्यांचे स्वतंत्र तिकीटघर
•  ओळखपत्रासाठी आधारकार्ड, दोन फोटो हवेत
•  कक्षात थेट तिकीट काढल्यास अतिरिक्त शुल्क नाही 
•  ऑनलाईन तिकीट सेवाही सुरू 
•  दोन्ही कंपन्यांच्या संकेतस्थळावर सुविधा