राज्यातील ४१ सहकारी साखर कारखान्यांना विज विक्रीचे अनुदान

राज्यातील ४१ साखर कारखान्यांना ११२ कोटी

महावितरणकडून वीज विक्रीचे अनुदान ः जिल्ह्यातील सहा कारखान्यांचा समावेश

सकाळ वृत्तसेवा
बिद्री, ता. ३१ : राज्यातील सहकारी व खासगी साखर कारखान्यांच्या बगॅस आधारित सहवीजनिर्मिती प्रकल्पांकडून गाळप हंगाम २०२३-२४ मध्ये महावितरणला विक्री केलेल्या विजेसाठी प्रतियुनिट १ रुपये ५० पैसेप्रमाणे ११२ कोटी १० लाख रुपये अनुदान देण्यात येणार आहे. यामध्ये राज्यातील ४१ व कोल्हापूर जिल्ह्यातील सहा साखर कारखान्यांचा समावेश आहे.
साखर कारखान्यांच्या बगॅस आधारित सहवीज प्रकल्पाकडून महावितरण कंपनीला वीज निर्यात केली जाते. निर्यात विजेला प्रति युनिट १.५० रुपये अनुदान एक वर्षासाठी देण्यास मार्च २०२४ मध्ये मान्यता दिली आहे. त्यानुसार साखर आयुक्त पुणे यांनी अटी व शर्तीच्या अनुषंगाने प्रस्तावांची छाननी करून ४१ कारखान्यांचे प्रस्ताव सादर केले होते. त्या प्रस्तावित सर्व साखर कारखान्यांना अनुदान मंजूर केले आहे.
राज्यातील ४१ साखर कारखान्यांच्या सहवीज प्रकल्पांची ७०२.७ मेगावॅट कार्यान्वित क्षमता असून, या कारखान्यांनी सन २०२३-२४ च्या गाळप हंगामात १ अब्ज ७४ कोटी ३९ लाख १५ हजार ८३ युनिट वीजनिर्मिती केली आहे. तर या हंगामात महावितरणला ९३ कोटी १५ लाख ७९ हजार ९८२ युनिट वीज निर्यात केली आहे. त्यानुसार ११२ कोटी १० लाख रुपयांचे अनुदान वितरित करण्यात येणार आहे.
.........
जिल्ह्यातील अनुदानपात्र कारखाने व अनुदान रक्कम
शरद सहकारी साखर कारखाना, नरंदे    ः १ कोटी ४२ लाख
शाहू सहकारी साखर कारखाना, कागल ः २ कोटी ३१ लाख
बिद्री सहकारी साखर कारखाना           ः १ कोटी ४४ लाख
जवाहर साखर कारखाना फेज १          ः १ कोटी ९३ लाख
जवाहर साखर कारखाना फेज १               ः ३१ लाख
रेणुका शुगर इचलकरंजी                    ः ५ कोटी २१ लाख
........................