दानोळी येथे बिरदेव परडी व जळ यात्रा शनिवारपासून

बिरदेव जळाची परडी यात्रा उद्यापासून
दानोळी, ता. १२ ः येथील पंचवार्षिक बिरदेव जळाची परडी यात्रा शनिवारपासून (ता. १४) सुरू होत आहे. तीन दिवस असणाऱ्या यात्रेचे नियोजन बिरदेव यात्रा कमिटी व समस्त धनगर समाजाकडून केले जात आहे. यात्रा १६ मेपर्यंत आहे. यात्रेची जय्यत तयारी केली आहे.
शनिवारी सायंकाळी सात वाजेपर्यंत वालुंग जमा होतील. रात्री दहा वाजता परडी जळाला जाणे व श्री बिरदेवाच्या पालखीची रथातून मिरवणूक निघणार आहे. धनगरी ढोल व कैताळाच्या अखंड गजरात मिरवणूक काढण्यात येणार आहे.
रविवारी (ता. १५) दुपारी बारा वाजता पालखीचे मंदिरात आगमन व देवाच्या भाकणुकीचा कार्यक्रम होणार आहे. रात्री दहा वाजेपर्यंत महाप्रसाद होईल. रात्री धनगर ओव्यांचा कार्यक्रम होणार आहे. सोमवारी (ता. १६) सकाळी नऊ वाजता बिरदेव पालखीची मिरवणूक काढण्यात येणार आहे. त्यानंतर दुपारी दोन वाजता भंडारा फोडण्याचा कार्यक्रम होऊन यात्रेची सांगता करण्यात येणार असल्याची माहिती बिरदेव यात्रा‌ कमिटीकडून दिली आहे.