उचगावात 41 हजारांची चोरी

शटर उचकटून
मुद्देमाल पळविला
उचगावात घटना; गॅस शेगड्यांचा समावेश
गांधीनगर, ता. २३ : गांधीनगर मुख्य रस्त्यावर उचगाव (ता. करवीर) हद्दीत असणाऱ्या मोहित ट्रेडर्स या दुकानाचे लोखंडी शटर उचकटून अज्ञात चोरट्यांनी ४१ हजार रुपयाचा मुद्देमाल लंपास केला ही घटना आज पहाटेच्या सुमारास घडली. याबाबतची फिर्याद मोहित सुरेशचंद गुप्ता (वळीवडे, ता. करवीर) यांनी गांधीनगर पोलीस ठाण्यात दिली.
पोलिसांकडून मिळालेली अधिक माहिती अशी, गांधीनगर मुख्य रस्त्यावर तावडे हॉटेल शेजारी मोहित ट्रेडर्स नावाचे गॅस शेगडी विक्रीचे दुकान आहे. दुकान मालक गुप्ता हे रात्री नऊच्या सुमारास दुकान बंद करून घरी गेले. चोरट्याने पहाटे दुकानाचे शटर उचकटून दुकानातील गॅस शेगडीच्या पितळी वाट्या, तसेच अन्य साहित्य असा एकूण ४० हजार ५०० रुपयांचा मुद्देमाल लंपास केला. घटनेची नोंद गांधीनगर पोलीस ठाण्यात झाली असून अधिक तपास पोलीस हेडकॉन्स्टेबल विराज डांगे करत आहेत.