बाल लैंगिक अत्याचार घडल्यास तक्रार करा

06980

----------
बाल लैंगिक अत्याचार घडल्यास तक्रार करा
सीमा बडे; नवे पारगाव येथील पाराशर शैक्षणिक संकुलात व्याख्यान
घुणकी, ता. २४ : बाल लैंगिक अत्याचार घडल्यास तक्रार करावी. भीतीपोटी बालके तक्रार करण्यास पुढे येत नाहीत. समाजात व शैक्षणिक संस्थांमध्ये बाल लैंगिक अत्याचाराच्या अनेक घटना घडतात. गुन्हेगारांवर ‘पोक्सो’ कायद्यांतर्गत कारवाई करू, असे प्रतिपादन निर्भया पथकाच्या पोलिस उपनिरीक्षक सीमा बडे यांनी केले.
नवे पारगाव (ता. हातकणंगले) येथील पाराशर शैक्षणिक संकुलात बाल लैंगिक अत्याचारविरोधी जनजागृतीसंदर्भात आयोजित व्याख्यानात त्या बोलत होत्या. अध्यक्षस्थानी स्वामी विवेकानंद शिक्षण संस्थेचे आजीव सेवक प्राचार्य शशिकांत काटे होते. सीमा बडे म्हणाल्या, ‘‘अनेक शैक्षणिक संस्थांत रॅगिंगचे प्रकार घडतात. रॅगिंगसारख्या वाईट गोष्टी टाळून विद्यार्थ्यांनी करिअरला प्राधान्य द्यावे. रॅगिंगसारख्या गुन्हेगारी प्रकाराने संस्कार मातीमोल ठरतात. मोबाइलचा वापर गरजेची बाब असली तरी क्षणिक सुखाच्या मागे न लागता विद्यार्थ्यांनी मोबाइलचा दुरुपयोग टाळावा.’ कॉन्स्टेबल शैलेश पाटील, तानाजी पाटील, सुप्रिया बेंद्रे, रोहिणी काटकर, पर्यवेक्षक माणिक कुरुंदवाडे, प्रा. के. डी. पाटील, बाबासाहेब करवडे उपस्थित होते.