विश्ववारणा स्कूलमध्ये कारगिल विजय दिवस

06988
--------
विश्ववारणा स्कूलमध्ये कारगिल विजय दिवस
घुणकी, ता. २६ : कारगिल युद्धात मी सहभागी होतो. प्रत्येक सैनिक जिवाची बाजी लावून लढल्यानेच यश आले. अशी वेळ पुन्हा येऊ नये यासाठी युवकांनी देशसेवेला प्राधान्य दिले पाहिजे, असे मत कोल्हापूर जिल्हा सैनिकी फेडरेशनचे कार्याध्यक्ष कॅप्टन गणपतराव घोडके यांनी तळसंदे (ता. हातकणंगले) येथे व्यक्त केले.
येथील विश्व वारणा पब्लिक स्कूलमध्ये कारगिल विजय दिवस साजरा केला. यावेळी ते बोलत होते. प्रारंभी वीर जवानांना श्रद्धांजली वाहण्यात आली. छत्रपती शिवाजी महाराजांच्या प्रतिमेचे पूजन कॅप्टन घोडके, कॅप्टन संपत परीट, सुभेदार मेजर संजय शिंदे, सुभेदार रामचंद्र पवार आदींच्या हस्ते झाले. विद्यार्थ्यांनी कारगिलच्या युद्धभूमीवर हे देशभक्तीपर समूहगीत सादर केले. मुख्याध्यापक रमेश पाटील, सचिव डी. पी. पाटील, बी. एस. पाटील व विद्यार्थ्यांनी मनोगत व्यक्त केले. सुभेदार सयाजी शिंदे यांनी कारगिलचा इतिहास मांडला. आजी-माजी सैनिकांचा व दहावी व अकरावीच्या गुणवंत विद्यार्थ्यांचा सत्कार केला. हवालदार गोरखनाथ नरुटे, हवालदार, अमर पानसकर, भिकाजी घाडगे, कुमार गायकवाड, नाईक सुभेदार शिवाजी धनवडे आदी उपस्थित होते.