पान ३

गारगोटीतून २१ तोळे दागिने चोरीस
गारगोटी, ता. १३ : येथील इंजूबाई कॉलनीतील घरातून भरदिवसा २१ तोळे सोन्याचे दागिने चोरीस गेल्याची घटना घडली आहे. चोरीची भुदरगड पोलिसात नोंद झाली. पोलिसांनी सांगितले, अमोल जनार्दन देसाई यांनी कार्यक्रमानिमित्त बुधवारी बँकेच्या लाॅकरमधून सोने काढून घरी आणले होते. ते घरातील बेडरूममधील टेबलावर ठेवले होते. दरम्यान, पाऊस आल्यामुळे बाहेर वाळत घातलेले कपडे काढण्यासाठी त्यांची आई साधना बाहेर गेल्या असता हीच संधी साधून अज्ञात चोरट्यांनी घरात प्रवेश करून टेबलवरील आठ बांगड्या, दोन बिलवर, दोन ब्रेसलेट, आठ अंगठ्या असा सुमारे २१ तोळे सोन्याचे दागिने घेऊन पोबारा केला. चोरट्यांनी बँकेपासून घरापर्यंत पाळत ठेवून सोने लंपास केल्याचा संशय व्यक्त केला जात आहे.