विनयभंग शिक्षा

तिळवणीच्या तरुणास
विनयभंगप्रकरणी शिक्षा
इचलकरंजी, ता. ३० : अल्पवयीन महाविद्यालयीन युवतीचा विनयभंग केल्याप्रकरणी येथील जिल्हा सत्र न्यायालयाने एकास शिक्षा सुनावली. सूरज मिलिंद कांबळे असे त्याचे नाव आहे. दोन विविध कलमाखाली त्याला एक महिना कैद आणि १० हजार ५०० रुपये दंडाची शिक्षा सुनावली. तिळवणी (ता. हातकणंगले) येथील सूरज कांबळे याने अल्पवयीन महाविद्यालयीन युवतीचा पाठलाग करून तिचा विनयभंग केल्याची घटना ऑक्टोबर २०१७ मध्ये घडली होती. याप्रकरणी हातकणंगले पोलिसांत कांबळेविरोधात गुन्हा दाखल झाला होता. पोलिस उपनिरीक्षक आर.के. रानगर यांनी तपास करून दोषारोपपत्र दाखल केले होते. सुनावणीत पीडित युवती, तपास अधिकाऱ्यांसह सात साक्षीदारांच्या साक्ष झाल्या. याप्रकरणी सरकारी वकील हेमंत मोहिते-पाटील यांचा युक्तिवाद ग्राह्य मानून जिल्हा सत्र न्यायाधीश आर. एन. बावनकर यांनी सूरज कांबळे यास विविध कलमान्वये १महिना कैद आणि १० हजार ५०० रुपये दंडाची शिक्षा सुनावली.