पोलिस वृत्त

जुगार अड्ड्यावर
इचलकरंजीत छापा
इचलकरंजी : शहरातील आवळे गल्ली येथे जुगार अड्ड्यावर गावभाग पोलिसांनी कारवाई केली. या कारवाईत एकूण ७ जणांवर गुन्हा दाखल करून त्यांच्याकडून रोकड, दोन मोबाईल असा एकूण ८० हजार १९० रुपयांचा मुद्देमाल जप्त केला. उमर शहानवाज लोकापुरे (कोरोची), सुनील बाळय्या स्वामी (शहापूर), दादा अब्दुलरजाक बेपारी (इचलकरंजी), संदेश सुकुमार चौगुले (कोरोची), सुनील तानाजी तडाखे (आवळे गल्ली), अशोक पांडुरंग माने (नारायणनगर) आणि रॉबर्ट अरुण आवळे अशी गुन्हा दाखल झालेल्यांची नावे आहेत. आवळे गल्ली येथील एका पत्र्याच्या शेडमध्ये रॉबर्ट अरुण आवळे याने जुगार अड्डा सुरू केल्याची माहिती पोलिसांना मिळाली. पोलिसांनी बुधवारी (ता. ३०) रात्री अकराच्या सुमारास छापा टाकून ७ जणांना ताब्यात घेतले.

छेडछाडप्रकरणी
तरुणाला अटक
इचलकरंजी : फोटो एडिट करून व्हायरल करण्याची धमकी दिल्याप्रकरणी रेकॉर्डवरील एकावर गावभाग पोलिसांनी गुन्हा दाखल केला. ओंकार विजय साळुंखे (वय २१) असे त्याचे नाव आहे. ओंकारच्या मोबाईलमध्ये पीडित तरुणीचे फोटो होते. हे फोटो एडिट करून व्हायरल करण्याची धमकी त्याने पीडितेला दिली होती. तसेच तो वेळोवेळी पैसे देण्याची मागणी करत होता. पैसे न दिल्यास तिला व तिच्या कुटुंबाला ठार मारण्याची त्याने धमकी दिली होती. पीडितेच्या तक्रारीवरून गावभाग पोलिसांनी साळुंखे याच्यावर गुन्हा दाखल केला आणि अटक केली.