करवीर महोत्सवाचे वाकरे येथे आयोजन

करवीर महोत्सवाचे
वाकरे येथे आयोजन
कुडित्रे, ता. २६ : व्हिजन चॅरिटेबल ट्रस्ट, कोल्हापूर या संस्थेतर्फे वाकरे (ता. करवीर) येथील विठाई-चंद्राई हॉल शेजारील मैदानात २८ एप्रिल ते १ मेअखेर करवीर महोत्सवाचे आयोजन करण्यात आले आहे. महोत्सवाचे उद्‍घाटन खासदार धनंजय महाडिक, आमदार विनय कोरे, आमदार महेश लांडगे, आमदार जयंत आसगांवकर, कार्यकारी नियोजन मंडळाचे अध्यक्ष राजेश क्षीरसागर, वाकरेच्या सरपंच अश्विनी पाटील यांच्या प्रमुख उपस्थितीत सायंकाळी ६ वाजता होणार आहे, अशी माहिती व्हिजन चॅरिटेलबल ट्रस्टचे अध्यक्ष संताजी घोरपडे यांनी दिली.
घोरपडे म्हणाले, ‘‘महोत्सवाअंतर्गत चार दिवस आंबा, तांदूळ व कृषी प्रदर्शन, शेती अवजारे व बियाण्यांचे स्टॉल, महिलांसाठी कुकुंमार्चन, मेहंदी व मेकअप स्पर्धा, झिम्मा फुगडी स्पर्धा, जात्यावरच्या ओव्या, खेळ पैठणीचा, देवीचा जागर, महिलांसाठी आरोग्य शिबीर, बालगोपांलासाठी बालजत्रा, विविध खाद्य पदार्थ, जादुचे प्रयोग, व्याख्याने, नाटक, भजन, गायन आदी कार्यक्रमाचे आयोजन केले आहे.
ग्रामीण भागातील महिलांना रोजगार उपलब्ध व्हावा तसेच बचत गटांनी तयार केलेल्या मालाला बाजारपेठ उपलब्ध व्हावी याकरीता या महोत्सवात सुमारे २०० स्टॉल उपलब्ध करुन दिले आहेत. या महोत्सवास नागरिकांनी भेट द्यावी.’’