डबल डेकर शहरात

66532

शहरात धावली इलेक्ट्रिक डबल डेकर
चाचणीसाठी आलेली बस; केएमटीच्या आठवणींना उजाळा

कोल्हापूर, ता. ४ ः शहरातील रस्त्यावर आज अचानक डबल डेकर धावताना दिसल्याने शहरात २२ वर्षांपूर्वी बंद झालेल्या केएमटीच्या डबल डेकरच्या आठवणींना शहरवासीयांनी उजाळा दिला. मुंबईतील ‘बेस्ट’करिता चाचणीसाठी गेलेली ही ६५ आसन क्षमतेची इलेक्ट्रिक एसी बस चेन्नईला जाताना काहीकाळ शहरात आली होती. ती पाहण्यासाठी नागरिकांनी गर्दी केली.
मुंबईला चाचणीसाठी गेलेली अशोक लेलॅंड स्विच या कंपनीची ही बस तावडे हॉटेलपासून कावळा नाका येथील बसच्या कंपनीजवळ आली. तिथे काही काळ थांबून पुढे रवाना झाली. नवीन पद्धतीची डबलडेकर पाहून अनेक नागरिकांनी उत्सुकतेने माहिती घेतली. बसमध्ये अत्याधुनिक सुविधा असून सीसीटीव्ही आहेत. साडेतीन कोटीची बस असून, एकदा चार्ज केल्यानंतर ५२० किलोमीटर धावते. बॅटरी चार्जिंग तासात होते. मुंबईच्या ‘बेस्ट’च्या ताफ्यात पूर्वीपासून डबल डेकर आहेत. त्या पाहून केएमटीने २२ डबल डेकर खरेदी केल्या होत्या. मुंबईनंतर केवळ कोल्हापुरात डबल डेकर धावत होत्या. त्यामुळे पर्यटक, शहरवासीयांना त्याचे अप्रूप होते. वरच्या मजल्यावर, तेही समोरील खिडकीत बसून शहरात फेरफटका मारण्याची औरच मजा होती. स्पेअर पार्टची समस्या निर्माण झाल्यावर मात्र २००२ मध्ये या बस बंद करण्याचा निर्णय घेतला.
आतानवीन बस घ्यायच्या असल्याने तसेच तोट्याच्या विषयामुळे केएमटी चर्चेत आली आहे. खासदार महाडिक यांनी पाहणी केल्यानंतर अशा इलेक्ट्रिक बसेस केएमटीच्या ताफ्यात घेण्यासाठी केंद्र शासनाकडे पाठपुरावा करणार असल्याचे सांगितले. तर आमदार सतेज पाटील यांनीही केएमटीला नवीन एसी बस देण्याचे नियोजन केल्याने त्यांनीही बसची माहिती घेतली.