टर्न टेबल लॅडर

9713

टर्न टेबल लॅडर महापालिकेत दाखल
आपद्‍कालीन सेवा; १५ दिवसांत होणार कार्यान्वित
कोल्हापूर, ता. ५ ः शहरातील उंच अपार्टमेंटमधील रहिवाशांच्या सुरक्षेसाठी गरजेचे असलेले टर्न टेबल लॅडर अखेर महापालिकेत दाखल झाले. अक्षय तृतीयेच्या मुहूर्तावर हे वाहन आले असले तरी त्याचे उद्‍घाटन झालेले नाही. किमान पंधरा दिवसानंतर ती ताफ्यात समाविष्ट केली जाणार आहे.
महापालिकेने अकरा मजली इमारतींना परवानगी देण्यास सुरूवात केली. त्यामुळे ५५ मीटर उंचीपर्यंतच्या इमारतीमध्ये अडकलेल्या नागरिकांची सुटका करण्यासाठी टर्न टेबल लॅडरची गरज भासू लागली. त्यासाठी शासनाकडे प्रस्ताव पाठवून मंजुरी घेतली. त्यातून जपानच्या कंपनीला ऑर्डर देण्यात आली. गेल्या आठवड्यात हे वाहन मुंबईत बंदरात आले होते. तेथील टॅक्सची प्रक्रिया पूर्ण करून लॅडर कोल्हापुरात आणले जाणार होते. त्यानुसार अक्षय तृतीयेला वाहन महानगरपालिकेने कोल्हापुरात आणले.
टिंबर मार्केट येथील अग्निशमन दलाच्या इमारतीत ते ठेवण्यात आले आहे. या वाहनाचे थर्ट पार्टी ऑडिट केले जाणार आहे. त्यासाठी एजन्सीजला पत्र दिले आहे. ते पूर्ण झाल्यानंतर आरटीओकडून पासिंग करून घेण्यात येईल. ही प्रक्रिया पूर्ण झाल्यानंतर अग्निशमन दलाच्या जवानांना त्याचे प्रशिक्षण दिले जाणार असून त्यानंतर ते खऱ्या अर्थाने ताफ्यात कार्यरत होणार आहे. यासाठी किमान पंधरा दिवसाचा कालावधी लागण्याची शक्यता आहे.