इचलकरंजी परिसरातील संक्षिप्त बातम्या

19820
इचलकरंजी : येथील चार खेळाडूंनी योगासन खेलो इंडिया स्पर्धेत शिवाजी विद्यापीठाच्या संघातून यश मिळविले.

राष्ट्रीय स्पोर्टस फेडरेशनचे यश
इचलकरंजी : बेंगळूर येथे झालेल्या योगासन खेलो इंडिया स्पर्धेत येथील राष्ट्रीय स्पोर्टस फेडरेशनच्या खेळाडूंनी यश मिळविले. मनन कासलीवाल, ऋषीराज माने, घननील लोंढे, ओंकार दाभोळे, अनिकेत म्हेत्रे, अभिजित सावंत या विद्यार्थ्यांच्या शिवाजी विद्यापीठाच्या संघाने स्पर्धेत द्वितीय क्रमांक पटकाविला. या विद्यार्थ्यांचा सन्मान केंद्रीय अवजड उद्योग मंत्री महेंद्रनाथ पांडे, डॉ. चैनराज रायचंद, फेडरेशनचे सचिव डॉ. जयदीप आर्य, राष्ट्रीय उपाध्यक्ष डॉ. संजय मालपाणी यांच्या हस्ते करण्यात आला. विद्यार्थ्यांना योग प्रशिक्षक सुहास पवळे यांचे मार्गदर्शन लाभले.
----------
‘डायनॅमिक’च्या खेळाडूंची निवड
इचलकरंजी : येथील डायनॅमिक स्पोर्टस क्लबच्या दोन खेळाडूंची राज्यस्तरीय स्पर्धेसाठी निवड झाली आहे. या स्पर्धा पुणे (बाणेर) येथे होणार आहेत. गौरी शिरगुरे व प्रांजल पवार यांची मुलींच्या कबड्डी संघात निवड झाली आहे. प्रशिक्षक प्रा. शेखर शहा यांचे त्यांना मार्गदर्शन लाभले. मंडळाचे अध्यक्ष संजय कुडचे, भूषण शहा, सुनील पाटील, अतुल बुगड आदींनी त्यांचा सत्कार केला.
---------
रंगमंचीय कला प्रदर्शनाचे आयोजन
इचलकरंजी : येथील नाईट कॉलेजमध्ये एकदिवसीय रंगमंचीय कला प्रदर्शनाचे आयोजन करण्यात आले आहे. यामध्ये रंगमंचीय कलाविष्कारांची प्राथमिक ओळख, गायन, वादन, निवेदन, अभिनय, वक्तृत्व अशा विविध कलाप्रकारांची सादरीकरणासंदर्भात प्राथमिक माहिती तज्ज्ञ व्यक्तीच्या मार्फत देण्यात येणार आहे. हे शिबिर रविवारी (ता. ८) सकाळी १० ते ५ या कालावधीत महाविद्यालयात होणार आहे. नाईट कॉलेजच्या राष्ट्रीय सेवा योजना विभाग, रोटरी क्लब ऑफ एक्झिक्युटिव्ह, रंगयात्रा नाट्य संस्था, तुळजाराम सराफ, योगेश्‍वरी प्रतिष्ठान, केडी म्युझिक यांच्यातर्फे शिबिर होणार आहे. शिबिरासाठी वय वर्षे १४ बंधनकारक असून प्रवेश मोफत असणार आहे. इच्छुकांनी प्रशिक्षणाचा लाभ घ्यावा, असे आवाहन महाविद्यालयातर्फे करण्यात आले.
-----------
बेवारस पुरुषाच्या मृत्यूची नोंद
इचलकरंजी : एका बेवारस पुरुषाचा मृत्यू झाल्याची नोंद शहापूर पोलिस ठाण्यात झाली. मृताचे वय अंदाजे ६५ ते ७० असून अंगाने मध्यम, डोकीचे केस विरळ, अंगात आकाशी निळसर शर्ट आहे. या मृतदेहाची ओळख अद्याप पटली नसून सीआरपीसी १७४ प्रमाणे शहापूर पोलिसात गुन्हा दाखल करण्यात आला आहे.