शहर पर्यटकांनी बहरले

22063
पर्यटकांमुळे शहर हाऊसफुल्ल
-
वाहतुकीची कोंडी, पार्किंग भरले

सकाळ वृत्तसेवा
कोल्हापूर, ता. १५ ः सलग सुट्या आल्याने शहरात दोन दिवसांपासून पर्यटकांची प्रचंड गर्दी पहायला मिळाली. रविवारी दुपारीच शहरातील सर्व पार्किंग वाहनांनी भरून गेली. त्यामुळे भाऊसिंगजी रोड, राजाराम रोड, बिंदू चौक येथे वाहनांच्य रांगा लागल्या होत्या. बाजारपेठांमध्ये पर्यटांकांची रेलचेल होती. अंबाबाईची दर्शनरांगही मंदिराबाहेर आली होती. शहराकडे येणाऱ्या मार्गावरही वाहतूक मंदगतीने सुरू होती.
कोरोनाचे निर्बंध शिथिल झाल्यानंतर शहरामध्ये भाविक आणि पर्यटकांचे येण्याचे प्रमाण वाढते आहे. शनिवार, रविवारची सुट्टी आणि त्याला जोडून आलेली सोमवारची बुद्धपोर्णिमेची सुट्टी यामुळे गेल्या दोन दिवसापासून शहरात पर्यटकांची गर्दी झाली. सकाळपासूनच शहरात वाहनांच्या रांगा लागल्या होत्या. दुपारी ३ वाजेपर्यंत बिंदू चौक पार्किंग भरले. त्यानंतर प्रायव्हेट हायस्कूल आणि दसरा चौक मैदानात वाहने उभी करण्यात आली. येथेही पार्किंगदेखील भरल्याने अखेर मिळेलत्या जागी पर्यटकांनी गाड्या लावल्या. त्यामुळे शहरात मोठ्या प्रमाणात वाहतुकीची कोंडी झाली. भाऊसिंगजी रोड, राजाराम रोड, बिंदू चौक, ताराबाई रोड या सर्व ठिकाणी वाहनांचा रांगा लागल्या होता. कोल्हापुरात येणारे पर्यटक देवी दर्शन घेतल्यानंतर पन्हाळा, जोतीबा येथे पर्यटकांनी जाणे पसंत केले. त्यामुळे कोल्हापूर-रत्नागिरी मार्गावर वाहनांची वर्दळ होती. गगनबावडा मार्गे कोकणात जाणाऱ्या वाहनांमुळे रंकाळा टॉवर, फुलेवाडी, कळे या मार्गावरील वाहतूक संथ गतीने सुरू होती. राधानगरी रोडवरही वाहनांची गर्दी दिसून आली. शहरातील महाद्वार रोड, ताराबाई रोड, जोतिबा रोड या मुख्य बाजारपेठांमध्ये पर्यटक फिरताना दिसत होते. हॉटेल, रेस्टॉरंट येथेही पर्यटकांची वर्दळ होती. सलग सुट्ट्यांमध्ये रविवार हा पर्यटकांचा वार ठरला.

यात्री निवासांचा त्रास नागरिकांना
शहरात आलेले पर्यटक देवीचे दर्शन घेण्यासाठी येतात. त्यामुळे शहरातील मध्यवस्तीत असणाऱ्या यात्री निवासात पर्यटक राहातात. त्यामुळे यात्री निवास मालकांचा व्यवसाय होतो. आसपासच्या हॉटेल, रेस्टॉरंटवाल्यांनाही व्यवसाय मिळतो. मात्र, पर्यटकांची वाहने परिसरातील गल्ली बोळात अस्ताव्यस्तपणे उभी केली जातात. त्यामुळे स्थानिक नागरिकांना आपली वाहने उभी करण्यासाठी जागा मिळत नाही. तसेच या भागात वाहतुकीची कोंडी होते. याकडे प्रशासनाने लक्ष देण्याची गरज असल्याचे नागरिकांचे म्हणणे आहे.