बदलत्या निसर्गाबरोबर बदलती शेती | Sakal
sakal

बोलून बातमी शोधा

बदलत्या निसर्गाबरोबर बदलती शेती
बदलत्या निसर्गाबरोबर बदलती शेती

बदलत्या निसर्गाबरोबर बदलती शेती

sakal_logo
By

शेतीतील वेगळ्या वाटा

23941
नौकूड : पुंडलिक मांगले यांच्या शेतातील पहिली कापणी झालेले जिरेनियम पीक.

बदलत्या निसर्गाबरोबर बदलती शेती
---
जिरेनियम शेतीचा प्रयोग; गडहिंग्लजच्या १७ शेतकऱ्यांनी निवडली अनवट वाट
अवधूत पाटील : सकाळ वृत्तसेवा
गडहिंग्लज, ता. २३ : लहरी हवामानाचा शेतीला फटका बसत आहे. पारंपरिक पिके आर्थिकदृष्ट्या परवडेनाशी झाली आहेत. असे असले तरी धोका पत्करायला नको, या मानसिकतेतून पारंपरिक शेतीची कास सोडली जात नाही. पण, गडहिंग्लज तालुक्यातील १७ शेतकऱ्यांनी अनवट वाट निवडली आहे. ‘बदलत्या निसर्गाबरोबर बदलती शेती’ हे सूत्र स्वीकारत जिरेनियम शेतीचा प्रयोग केला आहे. कमी पाणी, कमी मेहनतीत वर्षातून चार वेळा उत्पन्न देणारे पीक असल्याने या अनवट वाटेचा भविष्यात हमरस्ता झाल्यास नवल वाटणार नाही.
शेती आर्थिकदृष्ट्या परवडेनाशी झाल्याने शेतकरी नगदी पिकाकडे वळत आहेत. यात प्रामुख्याने ऊस पीक घेतले जाते. पण, आता उसाचा पर्याय म्हणून जिरेनियम शेतीची वेगळी वाट गडहिंग्लज तालुक्यातील शेतकऱ्यांनी निवडली आहे. जिरेनियम रोपांची एकदा लागवड केल्यास तीन वर्षे पीक घेता येते. पहिली कापणी साडेतीन ते चार महिन्यांनी येते. त्यानंतर ७५ ते ९० दिवसांनी पिकाची कापणी होते. वर्षाला एकरी ४० ते ४५ टन पाला (बायोमास) तयार होतो. पाच हजार रुपये टन या दराने त्याची शेतकऱ्यांकडून विक्री केली जाते. म्हणजे वर्षाला दोन लाखांचे उत्पन्न मिळते. पहिल्या वर्षी रोपलागवडीसाठी एकरी ४८ हजार रुपये, तर त्यानंतर वार्षिक सरासरी २० हजार रुपये उत्पादन खर्च येतो.
जिरेनियम शेतीसाठी उसाच्या तुलनेत मेहनत कमी आहे. खत व औषधे कमी लागतात. तसेच, ठिबकनेच पाणी द्यावे लागत असल्याने पाणीही कमी लागते. कोणत्याही ऋतूमध्ये याची लागवड करता येते, हे विशेष. त्यामुळे जिरेनियम शेती करणाऱ्या शेतकऱ्यांची संख्या वाढत आहे. पहिल्या वर्षी चार शेतकऱ्यांनी सुरुवात केली होती. आता दोन वर्षांत ती संख्या १७ वर पोचली असून, क्षेत्र २७ एकरावर विस्तारले आहे. जिरेनियम शेतीचे महत्त्व पटेल आणि विश्‍वासार्हता वाढेल, तशी ही संख्या वाढल्यास आश्‍चर्य वाटू नये.
-------------
चौकट
या शेतकऱ्यांनी घेतलेय पीक...
श्याम देसाई (हनिमनाळ), सुभाष हुकेरी (हिडदुगी), दयानंद गड्डी (नरेवाडी), भाऊराव पाटील, राकेश पाटील, विश्वजित पाटील (मनवाड), विजय पाटील (येणेचवंडी), अनिल पोटे (चन्नेकुपी), आप्पासाहेब कोड्ड, रोहन चौगुले, सुहास बिरंजे, संतोष बिरंजे, पुंडलिक मांगले (नौकूड), तानाजी पाटील, बापूसाहेब पाटील (नांगनूर), रायगोंडा पाटील (हसूरवाडी), त्रिविक्रम इसेन्स (मनवाड).
-------------
चौकट
प्रक्रिया युनिटची उभारणी...
जिरेनियमची पूर्ण वाढ झाल्यावर कापणी केली जाते. कापणीतून मिळणाऱ्या पाल्यावर प्रक्रिया केल्यावर त्यापासून तेल मिळते. या तेलाला सौंदर्यप्रसाधने, औषधांच्या निर्मितीसाठी मोठी मागणी आहे. बाजारात ११ हजार ५०० रुपये लिटर इतकी त्याची किंमत आहे. तालुक्यातील शेतकऱ्यांच्या उत्पादित मालावर प्रक्रिया करता यावी, यासाठी नौकूड व नांगनूर येथे दोन युनिट उभारण्यात आली आहेत.

Web Title: Todays Latest Marathi News Kop22y60862 Txt Kopdist Today

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top